Telefonmen jıi qal-jaǵdaı surasyp turǵanyńmen, anańnyń meıirimine shomylyp, ákeńniń bir-aq aýyz qýatty sózderin estip qaıtqandy kim qalamaıdy deısiz?!.
Birde tórkindep úıime bardym. Ádettegideı, kelinimiz dastarhanyn jaıyp, qonaqjaılylyq tanytty. Bizdiń kelgenimizdi bilgen kórshimiz de amandasa kelip, dastarhan basynan tabyldy. Shaı ishildi. Ata-anamyzdy kórip, kóńil jaılandy. Endi úlken asqa deıin biraz ýaqyt bar. Mundaıda bos otyrasyń ba, ótken-ketkendi aıtyp, jaǵdaı surasyp jatyrmyz. Sodan ne kerek, áńgimemizdiń sońy «Anańa qońyraý shalasyń ba?» degen taqyrypqa oıysyp, qyzý pikirtalasqa ulasty.
– Joooq, men anama merekelerde ǵana telefon shalamyn. Óz basym, jónsiz habarlasyp, mazalaryn almaımyn. Bir-eki aıda bir sóılesip qoıamyn, jetedi, – dep tákapparlana sóıledi kórshimiz.
– Qalaı shydaısyz, sonda, anańyzdy saǵynbaısyń ba? – dedim tańdana.
– Úırenip ketkenmin. Habarlaspasa, ıaǵnı bári jaqsy degen sóz... – dedi ol suraǵymdy ilip áketip.
– Al maǵan anam ózi habarlasyp turady. Olar aýylda ǵoı, – dedi kelinimiz.
Qasymda otyrǵan sińlim shydamady bilem, sózge aralasyp:
– Mássaǵan, men olaı isteı almaımyn... Lajy bolsa, alysta bolsa da kúnde
habarlasyp, anamnyń qal-jaıy men kóńil-kúıin suraımyn. Sosyn anama óziniń álemdegi eń keremet anna ekenin aıtamyn. «Jyly sóz jan semirtedi».
Anam kúnde tyńdasa da, birinshi ret estigendeı qýanyp qalady. Sosyn aınalyp-tolǵanyp qıasyna qonyp, óz betimen qanat qaqqan balapanyna duǵasyn jaýdyrady. Ákem men anamnyń boıynda balalary úlgi tutarlyq kóp nárse bar. Barlyq máseleni ekeýi aqyldasyp sheshedi. Birinsiz biri as ishpeıdi, qaıda barsa da jubymen jarasyp, qoltyqtasyp kele jatqanyna súısinesiń. Ekeýi skanvord sheshkendi jaqsy kóredi. Shemishkeshe shaqqanda tań qalasyń. Ózderine hobbı. Anammen habarlasqanda bir-eki aptaǵa jetetindeı gazet-jýrnal, skanvordtardy aparyp beretinimdi aıtamyn. Mine, osy sóıleskenime bar-joǵy bir-eki mınýt ketedi. Esesine anańnyń daýysyn estısiń, batasyna shomylasyń. «Aınalaıyn, sáttilik jolyńa! Alla jar bolsyn» deıdi meıirlenip.
– Siz bilesiz be, ana men balanyń arasynda kózge kórinbes energıa qýaty bolady. Sol qýattyń áseri me eken, áıteýir, anammen sóıleskennen keıin tula boıymdy erekshe bir sezim bılep ala jóneledi. Mine, sol sezim kóńilińe qanat bitirip, tirshiligińe súńgitip jiberedi ǵoı, shirkin! – dedi sińilim.
– Ómir bolǵan soń, bir kúniń bir kúnińe uqsamaı jatady. Sol sebepti keı kezderi bir-eki kún habarlaspaı qalatynym bolmasa, men de ata-anama jıi habarlasamyn. Densaýlyǵyn, jaǵdaıyn suraımyn. Anańnyń kóńil-kúıin bilgiń kelse, daýys yrǵaǵyna mán berseń jetip jatyr. Óz basym, birden sezemin, – dedim men áńgimeni túıindep.
Áıtse de kórshimizdiń sózderine oılanyp qaldym. «Qalaı anasymen tek merekelerde ǵana sóılesedi. Nege analardyń ár kúnin mereke etpeske?!» dep.
Eger ol óz anasymen – bir-eki aıda bir sóılesse, ózgeniń anasymen jyldap sóılespeýge bar ǵoı. «Habarlaspasa, ıaǵnı bári jaqsy degen sóz...» degeni nesi?!. Ómirde neshe túrli jaıttar bolyp jatady. Bálkim, onyń anasy qandaıda bir kómekke zárý shyǵar. Múmkin, syrqattanyp jatqan bolar, bári múmkin ǵoı. Kóp analar ondaı sátterde «balam ýaıymdamasyn» dep habarlaspaıdy, bilem. Barlyq ananyń balasyna degen meıirimi hám mahabbaty teńizdeı tereń, aspandaı bıik, kún nuryndaı shýaqty ekeni aqıqat.
Sondyqtan, anany saǵynbaý áste múmkin emes-aý... Máselen, qazir men úshin anam bar kezdegi tórkindep baratyn sol kúnderim saǵynyshqa aınalǵan. Eger anam bar bolǵanda, búgingi merekesimen quttyqtaýǵa qustaı ushyp baryp qaıtar edim, átteń... Islam ǵalymdarynyń biri: «Bir kúni anań o dúnıege attanady. Ananyń balaǵa degen mahabbaty ózimen birge ketedi. Bilip qoı, ananyń o dúnıege attanýymen, sen úshin «jánnat esikteriniń» biri jabylady. Egerde seniń anań
tiri bolsa, ony jalǵyz qaldyrma. Alysta bolsa dereý habarlas, úıde bolsa tezirek baryp, mańdaıynan súı! Qolyńnan kelgenshe anańa jaqsylyq jasa. Ol qandaı sóz aıtsa da, anańdy razy qylýǵa tyrys. Eshýaqytta anańa ashýlanba. Onyń saǵan degen mahabbaty ornalasqan «júregin» jaralaıtyn aýyr sózder aıtýshy bolma!» degen eken. Endeshe, analaryńyzdy barynda baǵalańyzdar! Óıtkeni, bul ómirde ANAnyń meıirimi men aıaly alaqanyna, ystyq qushaǵyna eshteńe jetpeıdi.
Máselen, siz búgin anańyzben habarlastyńyz ba? Eger áli sóılespeseńiz, dál qazir telefon shalyńyz, qýanyp qalsyn. Búgingi ANALAR kúni merekesimen quttyqtaýdy da umytpańyz! Áıtpese, mundaı sáttiń bir kúnderi múmkin bolmaıtyny anyq...