«Ońtústik» jáne «Astana» óńirlik qolbasshylyqtarynyń basshylyǵy sarbaz analary úshin 8 naýryz merekesine erekshe syılyq daıyndap, olardyń tikeleı efırde uldarymen kezdesýin uıymdastyrdy.
Áskerılerdiń bul bastamasyna «Qazaqstan» respýblıkalyq teleradıokorporasıasy Jambyl teleradıokompanıasynyń basshysy Gúlbarshyn Qulanbaeva men Saryarqa telearnasynyń jetekshisi Berik Dúısetaev qoldaý kórsetti, dep habarlaıdy almaty-akshamy.kz
– Bizge áskerı bólimderdiń sarbazdary arasynan analary bilim berý salasynda jumys isteıtin Tarazdyń týmalaryn tabý qıyndyq týdyrǵan joq, – deıdi «Ońtústik» óńirlik qolbasshylyǵy áskerleri qolbasshysynyń tárbıe jáne ıdeologıalyq jumystar jónindegi orynbasary polkovnık Oraz Kýchýkov. – Bizdiń bul «arnaıy operasıa» týraly kóptegen adamdar habardar bolǵanymen, analar bul jóninde bilgen joq.
№ 44 orta mekteptiń hımıa-bıologıa pániniń muǵalimi Móldir Sakıeva men № 53 orta mekteptiń bastaýysh synyp muǵalimi Nazıma Daýtbaeva «Raýan» baǵdarlamasynyń tikeleı efırine kelgende ózderin qandaı tosynsyı kútip turǵanyn bilgen joq. Áńgime mamandyqtan otbasylyq taqyrypqa aýysqan kezde stýdıa qonaqtary uldarynyń merzimdi qyzmet atqaratynyn aıtty. Osy sátti durys paıdalanǵan telejúrgizýshi olardyń armanyn surady. Al analar bolsa biraýyzdan uldaryn bir kórip, qushaqtaǵysy keletinin jetkizdi.
«Ońtústik» óńirlik qolbasshylyǵynyń Saryózektegi 12740 áskerı bóliminen kelgen qatardaǵy jaýyngerler Danıar Sakıev pen Madıar Atambek stýdıaǵa gúlmen kirgen kezde analary óz kózderine ózderi senbeı ań-tań bolysty.
«Astana» óńirlik qolbasshylyǵynda da osyǵan uqsas senarı oryn aldy. Tarazdaǵy 85395 áskerı bóliminde qyzmet etetin qos sarbaz Nurbol Kópbaev pen Rasýl Áljanov Qaraǵandyǵa arnaıy keldi. Merzimdi qyzmettiń jarty jylynda olar jaýyngerlik jáne dene daıyndyǵynda úzdik nátıjeler kórsetip, bólim qolbasshylyǵy ekeýine de onkúndik demalys bergen eken.
«Sálem, Qaraǵandy!» baǵdarlamasynyń merekelik shyǵarylymyna aýyl kitaphanashysy Baıan Hasenova qonaq boldy. Baǵdarlama rejıserleri uıymdastyrǵan «telekópir» Baıan úshin uly Nurbolmen kezdesýmen aıaqtaldy.
– Demalysqa shyqqan soń men týystaryma jetýge asyqtym. Ári anama tosynsyı jasaý múmkindigi týǵanyna qatty qýandym. Men oǵan este qalarlyq erekshe tartý jasaǵym keldi, – deıdi Nurbol Kópbaev.
Mektep asqanasynyń aspazy Ásel Kondorbaevanyń qatysýymen ótken baǵdarlamada oǵan ulynyń býket berip jibergeni aıtyldy. Kóp keshikpeı uly Rasýl stýdıaǵa gúlmen kirip kelgen kezdegi anasynyń tańdanysyn tilmen aıtyp jetkizý qıyn.
Telearna basshylary men júrgizýshileri, sondaı-aq habarǵa qatysqan keıipkerler «Ońtústik» óńirlik qolbasshylyǵy áskerleriniń qolbasshysy general-maıor Qýanyshbek Úshtaev pen «Astana» óńirlik qolbasshylyǵy áskerleriniń qolbasshysy polkovnık Erjan Ibraevqa merzimdi qyzmettegi sarbazdardyń analarymen kezdesýdi uıymdastyrýǵa járdem kórsetkeni úshin alǵystaryn bildirdi.