Anam men ákem teledıdar kórip otyrǵan-dy. Bir kezde anam:
– Búgin qatty sharshappyn, kettim, uıyqtaıyn, ýaqyt ta biraz bolypty ǵoı, – dedi.
Jolaı asúıge kire ketip, fasoldi sýǵa jibitip qoıdy, tońazytqyshtan et shyǵardy, erteńge. Tańǵy asqa múslı jete me, jetpeı me, sony qarady, konfetkaǵa qant septi. Sýly shúberekterdi jipke ildi de, túımesi túsip qalǵan kıimniń túımesin qadaýǵa otyrdy.
Bólmede shashylyp qalǵan oıynshyqtardy jınap aldy, uıaly telefondy qýat kózine qosty, gúlderge sý quıdy, mýsor shelektiń selofan paketin aýystyrdy, jıyrylyp qalǵan súlgini jolaı jóndeı ketti. Tereń tynys aldy da, jatyn bólmeni betke aldy.
Kenet muǵalimge habarlama jazý kerektigi esine túse ketip, bir sát aıaldady, sosyn balanyń erteń ekskýrsıaǵa baratyn jolyna aqsha shyǵardy. Qolyna kitap ile ketti. Sosyn beti-qolyn jýyp, tisin tazalap, betine krem jaqty.
– Sen uıyqtaýǵa ketpep pe ediń? – dep aıqaılady zal jaqtan ákem.
– Iá, ıá, mine, ketip baram, – degen anam ıttiń ıtaıaǵyna sý quıdy. Úıdiń syrtqy esigin kilttedi de, dálizdiń jaryǵyn óshirdi.
Balalardyń bólmesine bas suqty, qosýly qalǵan teledıdar men jaryqty óshirip, kishkentaılardyń aıaq astynda jatqan jeıde, shulyqtaryn jınap alyp, kir kıimder kárzeńkesine aparyp saldy. Áli de sabaq qarap otyrǵan tuńǵyshymen tildesti. Jatyn bólmege jetkenshe saǵatty qoıdy erteńge, aýyzǵy bólmedegi aıaq kıimderdi retke keltire saldy, erteń shuǵyl atqarylýy tıis sharýalar tizimi jazylǵan tildeı qaǵazǵa taǵy úsheýin qosty. Osy kezde ákem teledıdardy óshirip:
– Men kettim uıyqtaýǵa, – dedi. Shynymen de ákem jatyn bólmesine kirip ketti.
Negizi, bul jerde tańǵalarlyq eshteńe joq. Biraq áıelder nelikten uzaǵyraq ómir súredi? Sebebi, olar ýaqyttan buryn kete almaıdy: jumysy tym kóp...
Aýdarǵan Nurjamal ÁLİSHEVA