Almaty oblysynyń jurtshylyǵymen kezdesýde Qasym-Jomart Toqaev til máselesin qozǵady.
Memleket basshysy Qasym-Jomart Toqaev álem halyqtarynyń jaqsy qasıetterin boıǵa sińirip, ozyq úrdisterin úırený úshin til bilý qajettigin aıtty, dep habarlaıdy Almaty-akshamy.kz.
«Babalarymyz «Jeti jurttyń tilin bil, jeti túrli ilim bil» dep aıtqan. Shyn máninde, jastar neshe til bilse, aldynan sonsha eldiń esigi aıqara ashylady. Bul týǵan elińniń múddesine qyzmet etý úshin qajet. Degenmen, eń aldymen, jastarymyz ana tilin – qazaq tilin bilýi kerek.
Ana tilimiz birinshi orynda bolyp, bárimiz úshin negizgi basymdyq bolýy qajet. Solaı bolady da dep atap aıtqym keledi. Jalpy, biz tilimiz damymaı jatyr degen oıdan arylýymyz kerek. Táýelsizdik kezeńinde onyń mártebesi bıiktemese, tómendegen joq. Qanshama aqparat quraldary habar taratady. Gazet-jýrnaldar, kitaptar shyǵyp jatyr», – dedi Prezıdent.
Qazaqsha sóıleıtin jastar kóbeıip kele jatqanyn aıtqan Memleket basshysy tildik ortanyń túbegeıli ózgergenin de atap ótti.
«Qazaq tilin biletin ózge ult ókilderi de az emes. Soǵan sáıkes, qazaqsha fılmderge, ánderge jáne basqa da ónimderge degen suranys joǵary. Munyń bári qazaq tiliniń qoldaný aıasy jyldan jylǵa keńeıip kele jatqanyn kórsetedi. Sondyqtan, alańdaýǵa esh negiz joq.
Qazaq tilin paıdalanyp, saıası oıyndar júrgizýdiń qajeti joq. Osyndaı teris túsinikter keıbir elderdi qasiretke ushyratty. Memleket qazaq tilin qoldaý úshin tıisti sharalar qoldanyp jatyr. Bul baǵyttaǵy jumysty jalǵastyra beremiz.
Óz tilimizdi ózimiz ulyqtaýymyz kerek. Bul – óte durys. Biraq, ózge tilden bas tartýǵa bolmaıdy. «Óz tiliń birlik úshin, ózge til tirlik úshin» degen sóz bar. Biz til saıasatyn baıyppen júrgizýimiz kerek. Sonda ǵana kózdegen maqsatymyzǵa jetemiz», – dedi Q.Toqaev.