Eger ult ózinshe oılamaı, óz tilinde sóılemese, onda ult táýelsizdigi men memlekettiliginiń de máni joq. Al ulttyq sanany, ult tanymyn qalyptastyratyn onyń tili.
Til ǵylymy júıelenbeı, tildiń bolmys-bitimin, qasıetin tanyp-bilmeı ult tiliniń de qadir-parqy jalpyǵa uǵynyqty bola bermeıdi. Osy turǵydan qaraǵanda, til ǵylymyna eńbek sińirgen ǵalymdar belgili deńgeıde ulttyń saqtalyp, ómir súrýine, damýyna qyzmet etti deýge ábden bolady. Al bul qatardan Rábıǵa apaıdy atamasaq, Qazaq til ǵylymy deıtin úlken salany kóz aldymyzǵa elestetý múmkin emes.
Bıyl qazaqtyń osy bir aıtýly perzenti, eskiniń kózin kórip, esti qazaqqa til qadirin túsindirgen áıgili ǵalym Rábıǵa Syzdyqtyń dúnıege kelgenine 100 jyl. Jyl basynan beri Qazaq til ǵylymyna orasan zor eńbek etip, atalǵan ǵylym salasynyń kásibı deńgeıge jetýine ólsheýsiz úles qosqan tulǵanyń ǵasyrlyq mereıtoıy respýblıka kóleminde atalyp ótýde. Sondaı sharanyń biri ótken aptada Almatydaǵy Ulttyq kitaphanada ótti. Oǵan Rábıǵa Sátiǵalıqyzynyń ǵylymdaǵy shákirtteri, fılologtar men tilshi ǵalymdar, sondaı-aq, tarıhshylar men túrli salanyń zertteýshileri qatysty.
«Ana tiliniń abyzy» atty ǵylymı-teorıalyq konferensıada Rábıǵa Syzdyqtyń ómiri men tulǵalyq bolmysy, ǵylymdaǵy sony izderi, kisilik qasıetinen bastap, qundy muralaryna deıin taldaǵan baıandamalar jasaldy. Sonymen qatar, Ulttyq kitaphananyń N.Dáýletova atyndaǵy zalynda ǵalymnyń ómiri men eńbekterine arnalǵan kórme de uıymdastyrylǵan.
Ǵylymı sharanyń tizginin akademık, QR Prezıdenti janyndaǵy Ulttyq Ǵylym akademıasy Dırektorlar keńesiniń táýelsiz dırektory, profesor Kárimbek Qurmanálıev ustady. Alǵashqy sóz alǵan akademık Murat Jurynov R.Syzdyq muralaryn dáripteýdiń mańyzy men máni týraly toqtaldy. A.Baıtursynuly atyndaǵy Til bilimi ınstıtýtynyń dırektory Anar Fazyljan jyl basynan beri Rábıǵa Syzdyqtyń ǵasyrlyq mereıtoıyna arnalǵan ǵylymı sharalardyń retin tanystyryp ótti.
Instıtýt dırektory sondaı-aq, ǵalymnyń 100 jyldyq mereıtoıy qarsańynda eń aıtýly ǵylymı sharanyń biri aldaǵy qazan aıynda ótetinin jetkizdi. Iaǵnı, kelesi aıda Qazaq tili men til ǵylymynyń jaıyna qatysty Respýblıkalyq kongres ótpek. Týǵan tildi taqyryp etken alǵashqy jalpy respýblıkalyq kongres te R.Syzdyqtyń atynda ótetini aıtyldy. Rábıǵa Sátiǵalıqyzyna arnalǵan ǵylymı sharalardyń bári derlik týǵan tildiń búgini men erteńine qatysty ekenine toqtalǵan Anar Fazyljan qazirgi qazaq tilin qoldanýshylar arasyndaǵy saýatsyzdyq deńgeıiniń joǵarylaı túskenin jáne ult bolyp týǵan tildiń bolashaǵyn oılanýǵa týra kelip otyrǵanyn da jasyrmady.
Budan keıin R.Syzdyqtyń ǵylymdaǵy «sińlileri» nemese «qyzdary» atanǵan birqatar tiltanýshy ǵalymdar, fılologtar ǵalymǵa arnalǵan baıandamalaryn jasady. QR UǴA akademıgi, pedagogıka ǵylymdarynyń doktory, profesor Faýzıa Orazbaeva «Akademık Rábıǵa Syzdyq: tulǵa jaratylysy jáne ulttyq sana» atty ǵylymı baıandamasynda ǵalymdy ulttyq rýhanı tamyrdan nár alyp, álemdik ozyq órkenıet jetistikterin qosa qamtyǵan, ultyna qaltqysyz qyzmet etken birtýar perzent, ǴASYR TULǴASY ári ǴASYR ADAMY» degen qorytyndy jasady.
Al «Sóz áleýetindegi kórkem álemniń damý úderisi» atty baıandamasynda fılologıa ǵylymdarynyń doktory, profesor, A.Baıtursynuly atyndaǵy Til bilimi ınstıtýtynyń bas ǵylymı qyzmetkeri Jamal Mankeeva Rábıǵa Syzdyqtyń ǵylymı muralaryn ary qaraı zerttep-zerdeleý bolashaq til men til ǵylymynda asa mańyzdy ekenin túsindirdi.
Aıta keteıik, týǵan til men týǵan elge eleýli eńbek etken ǵalym Rábıǵa Syzdyq budan 4 jyl buryn 96 jasqa qaraǵan shaǵynda Almatyda kóz jumdy. Ómiriniń sońyna deıin ózi bata alǵan M.Áýezov pen Á.Marǵulan syndy ulylardyń amanatyna, óziniń bekzat bitimin, degdar qalybyn buzbaı, ǵylymdaǵy antyna adal boldy. Talan-tarajdan Ǵylym akademıasy jurtynyń aman saqtalyp qalýyna da Rábıǵa apaıdyń zor yqpaly bolǵanyn ǵylymı orta aıryqsha atap ótti.