Ótken jyldyń qorytyndysy boıynsha ana ólimi úsh ese tómendegen.
Byltyr 407 myń júkti áıel baqylaýda boldy, 412 myń bala dúnıege kelgen, dep habarlaıdy Almaty-akshamy.kz
Búgin Densaýlyq saqtaý mınıstrligi alqasynyń keńeıtilgen otyrysynda Premer-Mınıstrdiń orynbasary Altaı Kólginovtiń qatysýymen Densaýlyq saqtaý vıse-mınıstri Vácheslav Dýdnık memleket basshysynyń ana men bala densaýlyǵyn saqtaý máseleleri jónindegi tapsyrmalaryn iske asyrý týraly baıandama jasady.
Negizgi kórsetkishterdiń tómendeýine qaramastan, kadr tapshylyǵy, materıaldyq-tehnıkalyq jaraqtandyrý, ınfraqurylymnyń tozýy basty problema kúıinde qalyp otyr. Bul medısınalyq kómek kórsetý sapasyna tikeleı áser etedi.
Áıelder men balalarǵa bilikti medısınalyq kómek kórsetý úshin elde 5 myńnan asa MSAK obektisi, 240 perzenthana, onyń ishinde 39 perınataldyq ortalyq, 23 balalar aýrýhanasy jáne 4 respýblıkalyq klınıka jumys isteıdi.
Vıse-mınıstrdiń aıtýynsha, perzenthana deńgeıinde akýsher-gınekologtarmen jumys isteý 45%-dan 80%-ǵa deıin ózgeredi. Osy baǵyttaǵy kadr tapshylyǵyna qatysty búginde elimizde 275 akýsher-gınekolog, 323 anestezıolog-reanımatolog, 100 neonatolog jetispeıdi. Balalar stasıonarlarynda 200 pedıatr, 340 anestezıolog-reanımatolog tapshylyǵy baıqalady.
SQO-da neonatologtardyń, Atyraý oblysynda pedıatrlardyń, Túrkistan oblysynda balalar anestezıolog-reanımatologtarynyń tapshylyǵy erekshe nazar aýdartady.
Kadrlyq qajettilikterdi qanaǵattandyrý maqsatynda mınıstrlik 2022 jyly «Akýsher jáne gınekologıa» mamandyǵy boıynsha rezıdentýranyń 108 bilim berý grantyna, «Pedıatrıa», «Neonatologıa», «Balalar hırýrgıasy», «Balalar onkogematologıasy» mamandyqtary boıynsha 292 grantqa memlekettik tapsyrys bóldi. Óńirlerge 290 jas túlek, onyń ishinde 198 balalar dárigeri, 92 akýsher-gınekolog bólindi.
Vácheslav Dýdnık balalar ólimine áser etetin faktorlardyń qatarynda patronattyq baqylaýdyń tıimdiligin atady.
«El boıynsha balalardy ámbebap patronajdyq paketpen qamtý 86%-dy quraıdy. Olardyń tek 17%-y progresıvti baqylaýǵa jatady. Bul júrgiziletin patronajdar sapasynyń tómendigin kórsetedi. Halyqaralyq talaptarǵa sáıkes progresıvti pakettegi balalar sany keminde 30%-dy quraýy tıis», - dep atap ótti vıse-mınıstr.
Osylaısha, dene salmaǵy óte tómen balalardyń ómir súrý deńgeıi 4 ese ósti. Al náreste ólimi 1,7 ese, balalar ólimi 1,6 ese tómendedi. Neonataldyq hırýrgıanyń jáne osy tehnologıalardyń óńirlerge transfertiniń damýymen týabitti aqaýlary bar jańa týǵan nárestelerdiń ómir súrý deńgeıi 86%-dy qurady.
Infraqurylymnyń tozýyn jáne perzenthanalar men balalar stasıonarlarynyń tehnıkalyq jabdyqtalýynyń jetkiliksizdigin eskere otyryp, 2023 jyly memleket basshysynyń tapsyrmasy boıynsha halyqaralyq standarttar boıynsha 11 perınataldyq ortalyq salý máselesi pysyqtalyp jatyr.