Saýdagerlerdiń sózinshe, qurylys qysqa deıin aıaqtalýǵa tıis bolǵan. Alaıda basshylyq aýysyp ketip, jazdan beri turalaǵan. Al burynǵy dırektor "alǵan aqshamyzdy qaıtarmady" dep otyr.
"Biz Marjan degen kasırge berdik. Ol Danıar Álpıevtiń kasıri bolady. Sol kisige aqshany tapsyrdyq. Bul jaqta 300 adam býtıkke aqsha quıǵan. Jalpy 450 býtık satylǵan eken. Ortasha bul jaqta 4 mıllıonnan quıǵan. Men 23,5 mıllıon teńge quıdym. Ápkem 18 mıllıon quıdy. Sol sıaqty 9,8 mıllıon . 1 mıllıard 600 mıllıon teńge aqsha jınaǵan", -dep aıtty kásipker Álıa Kóshbespaeva
Saýdagerlerdiń kóbi qazir jumyssyz júr. Olar "aqshamyzdy qaıtarsyn" dep, Qarasaı aýdandyq polısıasyna da birneshe aı buryn shaǵymdanǵan. Alaıda "áli nátıje joq" deıdi.
"Berilgen chekterdiń báriniń kóshirmesin alyp jatyr. Biraq ta prokýratýradan da, Qarasaı aýdanynyń sot oryndary da eshqandaı is qozǵamaı jatyr. Álpıevke qatysty. Qurylysty "Kompanıa nomer odın" moınyna alyp otyr. "Osy býtıkter salynsa, qyzdar ornyn alsa" degen oıdamyz", deıdi kásipker Raıhan Aıdarbaeva.
Jańa kelgen basshylyq "qurylysty jalǵastyrýǵa qaıta kirisip jatyrmyz" deıdi. Burynǵy qurylys kompanıasymen kelisimshart buzylyp, basqasymen kelisken.
"Qazir qurylys qansha paıyzǵa júrgizildi, qandaı qurylys materıalymen istelgeni týraly smeta qujattaryn daıyndaý aıaqtaldy. Qurylys qolǵa alynyp, endi bul menshik ıesiniń óz qaltasynan tólenip, ózi qurylysty aıaqtaýǵa kepildik berdi",-degen ýáj atty "Altyn orda" bazary atqarýshy kompanıasynyń zańgeri İzbazar Óteýlın.
Al bazardyń burynǵy basshysy Danıar Álpıevtiń advokatynyń aıtýynsha, bul daýdyń quqyqtyq negizi joq, kelisimshart birjaqty buzylǵan.
"Ol aqshanyń bári tikeleı, ıaǵnı Álpıevtiń menshigindegi "Altyn orda nú kompanı" kompanıasy esepshotynan bank júıesimenen "Kompanıa nomer odın" JSHS esepshotyna túgel kelip túsken, ıaǵnı ony Álpıev alyp qashyp ketken joq. Ony tyǵyp alyp qalǵan joq. Bul sonymen rastalyp tur",-dep pikir bildirdi zańger Álibek Almabaev.
Saýdagerlerdiń jazǵan aryzy qazir Qarasaı aýdany polısıa bóliminde qaralyp jatyr. Almaty oblysy polısıasy istiń tirkelgenin habarlady. Máseleniń mán-jaıyn quzyrly organ anyqtaıdy.