«Qazgıdromet» RMK boljaýynsha osy jyldyń 12 qarasha men 15 qarasha aralyǵynda Almaty qalasynda jabysqaq qar jaýady. Túnde aýa temperatýrasy –4 gradýsqa deıin tómendep, kóktaıǵaq bolýy múmkin.
Osyǵan oraı, kólik ıelerine jazǵy dóńgelekterin qysqyǵa aýystyrý usynylady. Jolǵa muz qatýy múmkin, júrgizýshilerdi óte muqıat bolýǵa, araqashyqtyqty, búıirlik aralyqty saqtaýǵa, qolaısyz aýa-raıyn eskerip, jyldamdyqty asyrmaýǵa, shuǵyl burylmaýǵa jáne tejegishti birden baspaýǵa, jol belgilerin qatań saqtaýǵa shaqyramyz.
Jaıaý júrginshiler jolda abaılap júrip, múmkindiginshe saq bolýy kerek, júrgizýshi sizdi kórip, ótkizip jibergenine kóz jetkizip, kólik quraly jaýyn-shashyn kezinde, ásirese kóktaıǵaqta birden toqtaı almaıtynyn este saqtaý qajet.
Komýnaldyq qyzmetterdiń kóktaıǵaqqa qarsy jedel jáne sapaly jumys júrgizýi úshin kólik ıelerinen múmkindiginshe qalada qozǵalysty shekteı turýyn, mashınany joldyń jıegine qoımaýyn suraımyz.
Kóktaıǵaqqa qarsy jumysqa 10 merdiger uıym, 818 birlik tehnıka jáne 1 240 jumysshy jumyldyryldy.
Almaty qalasynyń komýnaldyq ınfraqurylymdy damytý basqarmasy