Aldaǵy úsh jylda Qazaqstannyń altyn óndirý salasynda jalpy quny 780 mıllıard teńgeni quraıtyn 13 ınvestısıalyq jobany iske asyrý josparlanǵan. «QazIndustry» AQ Jobalardy iske asyrýǵa monıtorıń júrgizý jáne taldaý dıreksıasy aqparaty boıynsha atalmysh jobalar aıasynda 3400 jańa jumys orny qurylatyn bolady, dep habarlaıdy aqshamnews.kz
2025-2028 jyldar aralyǵynda júzege asatyn jobalar aıasynda 20,6 mıllıon tonna ken óńdelip, 21 tonna Dore qorytpasy óndiriledi.
Saladaǵy aıtarlyqtaı damý qarqyny Qazaqstannyń álemdik qymbat metaldar naryǵyndaǵy ornyn nyǵaıta túsýge múmkindik beredi. Altyn jáne basqa da baǵaly metal bar iri ken oryndaryn qamtıtyn baı shıkizat bazasynyń bolýy respýblıkanyń altyn óńdeý salasyndaǵy jobalardy iske asyrý maqsatynda respýblıkanyń ınvestısıalyq tartymdylyǵyn arttyrady.
Jalpy, sońǵy on jylda elde ken baıytý kombınattaryn salý, jańǵyrtý jáne keńeıtý baǵytynda 19 joba iske asyryldy. Olardyń jyldyq ken óńdeý qýaty – 27,2 mln tonna, bul shamamen 29,1 tonna Dore qorytpasyn óndirýge múmkindik berse, bul jobalardyń jalpy quny 420,3 mıllıard teńgeni quraıdy. Salynǵan ınvestısıa kólemi shamamen 460 mlrd teńge bolyp, 4400 jańa jumys orny ashyldy.
İske asqan jobalardaǵy ınvestısıalardyń basym bóligi altyn óndirý fabrıkalaryn salýǵa baǵyttalǵan. Sonyń ishinde Aqmola oblysyndaǵy «Raıgorodok» ken ornynda jylyna 5 mln tonna ken óńdeıtin keshen («RG Gold» jáne «RG Processing» JSHS), sondaı-aq Abaı oblysyndaǵy «Baqyrshyq» ken ornynda jylyna 2 mln tonna ken óńdeıtin óndiris («Baqyrshyq taý-ken kásiporny» JSHS) bar.
Jobalardyń basym kópshiligi Aqmola jáne Qaraǵandy oblystarynda shoǵyrlanǵan. Al ınvestısıa kólemi boıynsha Pavlodar (27,7%) jáne Aqmola (18,8%) oblystary alda keledi.
Qazaqstandaǵy altyn óndirý salasyndaǵy ınvestısıalyq jobalar turaqty damyp keledi jáne strategıalyq mańyzǵa ıe. Joǵary tehnologıaly óndiristerdiń ósýi, halyqaralyq áriptestik jáne memlekettik qoldaý salanyń ári qaraı damýyna jáne ony jahandyq naryqqa shyǵarýǵa berik negiz qalaıdy.