Almaty qalasynda Uly Jeńistiń 80 jyldyǵyna arnalǵan mańyzdy shara ótti. Qala ákimi Erbolat Dosaevtyń bastamasymen Uly Otan soǵysy ardagerleriniń aleıasy ashyldy. Bul týraly Aqshamnews.kz saıty habarlaıdy.
Aleıany ashý rásimi Almatynyń tarıhı ortalyǵy sanalatyn 28 gvardıashy-panfılovshylar atyndaǵy saıabaqta ótti. Saltanatty sharaǵa qala ákimi Erbolat Dosaev, ardagerler, olardyń otbasylary, Qazaqstannyń eńbek sińirgen ártisteri men qoǵam belsendileri qatysty.
Bul is-shara Uly Jeńistiń 80 jyldyǵyna arnalǵan ekologıalyq aksıa aıasynda uıymdastyryldy. Aksıa «Taza Qazaqstan» respýblıkalyq baǵdarlamasy men «Almaty – bizdiń ortaq úıimiz» jalpy qalalyq naýqanynyń bir bóligi bolyp tabylady.
Aleıaǵa jasyl eskertkish retinde 6 metrlik iri jóke (lıpa) aǵashtary otyrǵyzyldy. Árbir aǵashtyń túbine ardagerdiń esimi jazylǵan arnaıy taqtaıshalar ornatyldy. Aǵashtardy otyrǵyzý kezinde zamanaýı agrotehnıkalyq ádister qoldanylyp, qaıyń tirekteri men tamyrdy sýarý júıeleri ornatyldy.
Ákim Erbolat Dosaev óz sózinde:
«Uly Jeńis – elimizdiń tarıhyndaǵy mańyzdy kezeń. Biz bıylǵy mereıtoılyq jyly Almatynyń barlyq aýdanynda bir ýaqytta ardagerler aleıasyn ashýdy jón kórdik. Bul oryndarda árbir turǵyn batyrlardy eske alyp, rýhyna taǵzym ete alady», – dedi.
Jıyn barysynda ardagerlerdiń urpaqtary aleıanyń ashylýyna rızashylyqtaryn bildirdi.
Iýlıa Zavadskaıa, ardager Olga Savenkonyń nemeresi:
«Lıpa – rýh kúshi, tózimdilik pen adaldyqtyń sımvoly. Bul aǵashtar ata-babamyzdyń janqıarlyq erligin eske salady», – dedi.
Lúdmıla Zınchenko, ardager Vasılıı Zınchenkonyń qyzy:
«Bul tamasha shara bizge ardagerlerdi eske alýǵa múmkindik berdi. Balalarymyzǵa batyr atalarynyń erligin aıtyp beretin bolamyz», – dedi.
Saýle Kolýmbaeva, ardager Darbala Jabataevanyń qyzy:
«Bul kún – barlyq ardager otbasylary úshin mańyzdy. Otyrǵyzylǵan aǵashtar – beıbit aspan syılaǵan batyrlarǵa arnalǵan tiri eskertkish», – dep alǵysyn jetkizdi.
Merekelik sharaǵa 100 jastaǵy soǵys ardageri Kambar Sársenov te qatysty.
«Ardagerlerdiń esimin máńgi este qaldyrý úshin jasalǵan bul bastamany quptaımyz. Bolashaq urpaq osy aǵashtardyń janynda turyp, atalarynyń erligin eske alady», – dedi qart jaýynger.
Almatynyń segiz aýdanynda da Uly Otan soǵysy ardagerleriniń aleıalary ashyldy. Barlyǵy 200 jóke aǵashy otyrǵyzyldy. Bul bastama Uly Jeńistiń 80 jyldyǵyn merekeleýdiń biregeı úlgisi bolyp, ardagerler rýhyna taǵzym etýdiń mańyzdy belgisine aınaldy.
Almatyda ashylǵan ardagerler aleıasy – batyrlardy máńgi este qaldyrýdyń kórneki úlgisi. Jóke aǵashtary Uly Otan soǵysynyń qaharmandaryn eske salyp, bolashaq urpaqqa rýhanı mura retinde saqtalady.