«Altyn mıkrofon» festıvali - talanttardy shyńdaǵan óner báıgesi
Baıqaýdyń sheshýshi kezeńinde elimizdiń ár óńirinen jáne alys-jaqyn shet elderden kelgen jas ánshiler óner kórsetti, dep habarlaıdy Almaty-akshamy.kz
Belgili ánshi Beıbit Seıdollauly tóraǵalyq etken qazylar alqasynyń quramynda Armenıa, Bolgarıa, Qyrǵyzstan, Belorýssıa, Ýkraına memleketteriniń bilikti mamandary boldy. Olardyń árqaısysy ózderimen birge endi qalyptasyp kele jatqan eń daryndy degen tańdaýly bir-eki ánshiden erte kelip, Tobyl óńirindegi óner baıqaýyna qosty. Bıylǵy «Altyn mıkrofonnyń» deńgeıi joǵary boldy.
Kezinde «Slaván bazarynda» top jarǵan Ernar Sadyrbaev osy baıqaýdan ósip shyqqan. Búgingi Abaı atyndaǵy memlekettik akademıalyq opera jáne balet teatrynyń beldi solısi Balýan Berkenov te - osy «Altyn mıkrofon» festıvalinen ósip shyqqan ánshi.
Baıqaýdyń bastapqy kezeńderi onlaın túrde ótti. Fınaldyq básekege osy irikteýden ótip, júzden júırik shyqqan 41 ónerpaz qatysty. Olar jas erekshelikterine qaraı kishi, orta, eresek jáne kásipqoı topqa bólinip, árqaısysy eki-eki ánnen oryndap shyqty.
Festıvál jeńimpazdary qazylar alqasynyń qalaýy boıynsha anyqtaldy. 7-10 jas aralyǵyndaǵy balǵyndar ishinen Alsý Ultýǵanova birinshi oryndy jeńip aldy. Al 11-13 jas aralyǵyndaǵy qatysýshylar arasynan qostanaılyq Iasmına Aıýpova, 14-17 jas aralyǵyndaǵy ónerpazdardyń ishinen Darıa Matveeva úzdik shyqty.
«Kásipqoılar» toby boıynsha 1-oryndy qostanaılyq jas ánshi Almat Jańabaı jeńip aldy. 2-orynǵa túrkıalyq Volkan Talshyk laıyq dep tanyldy. Al Gran-Prı syılyǵyn Nur-Sultan qalasynan kelgen jas daryn Aslan Amangeldıev jeńip aldy.
Bıyl festıválda Qazaqstannyń eńbek sińirgen qaıratkeri, kóp jyldar boıy osy baıqaýǵa qazylyq etip, talaı talanttyń jolyn ashqan kompozıtor Keńes Dúısekeev atyndaǵy arnaıy syılyq taǵaıyndaldy. Tuńǵysh júldeni Qyzylorda oblysynan kelgen taǵy bir talantty jas ónerpaz Eraly Eskendir ıelendi.