Bıyl mektep bitirýshiler emtıhandy óz mektepterinde tapsyrady.
Mektepti úzdik bitirip, «Altyn belgi» tósbelgisine úmitker túlekterge qoıylatyn talap kúsheıtildi, dep habarlaıdy Almaty-akshamy.kz.
QR Bilim jáne ǵylym mınıstri Asqat Aımaǵambetov oqý jetistikterin baǵalaý erejelerine ózgerister engizý týraly qol qoıdy. Endi «Altyn belgi» alý talaptary aıtarlyqtaı kúsheıtildi. Bul týraly BǴM basshysy óziniń Telegram kanalynda jazdy.
«Kelesi jyldan bastap 9-synypty aıaqtap, arnaıy atestat jáne 10-11 synyptardyń barlyq oqý toqsany boıynsha «úzdik» degen baǵa alǵan oqýshylar «Altyn belgi» tósbelgisine úmitker bola alady», – dep habarlady ol.
Sondaı-aq, talapkerler Nazarbaev zıatkerlik mektebi bazasynda matematıka páninen emtıhan tapsyrýy kerek. Mınıstrdiń sózinshe bul shara akademıalyq adaldyqty qamtamasyz etý úshin qabyldanǵan.
«Bul rette tapsyrmalar NZM-ge emtıhan tapsyratyndarǵa da, jalpy bilim beretin mektep bazasynda tapsyratyndarǵa da tapsyrmalar birdeı bolady» – dep atap ótti mınıstr.
Aımaǵambetovtyń aıtýynsha, byltyr «Altyn belgi» alǵan túlekter sany rekordtyq deńgeıge jetken. Alaıda ol túlekterdiń birshama bóligi UBT-dan tómen bal alǵan. Osyǵan baılanysty úmitkerlerdi úzdik belgisine obektıvti jáne ashyq baǵalaý úshin emtıhandardyń biri táýelsiz bilim berý uıymynda ótedi.
«Bıyl mektep bitirýshiler emtıhandy óz mektepterinde tapsyrady. Sondaı-aq belgiden bas tartý týraly ótinishter jaramsyz. Talaptarǵa saı keletin úmitkerler belgilengen tártipte qorytyndy attestasıadan ótedi» – dep túsindirdi mınıstr.
Atalǵan normalar kelesi jyldan bastap kúshine enetinine qaramastan, bıyl UBT nátıjeleri boıynsha «úzdik» belgisin berýdiń obektıvtiligi baǵalanatyn bolady. Mınıstr osyǵan oraı mektep ákimshilikteri, bilim bólimderi men basqarmalary qorytyndy emtıhandardy ótkizýdiń ashyqtyǵy men obektıvtiligin qamtamasyz etýi tıis ekenin atap ótti.