Aldaǵy jyldan bastap «Altyn alqa», «Kúmis alqa» taqqan kóp balaly analarǵa beriletin járdemaqy avtomatty túrde taǵaıyndalmaq. Bul týraly Eńbek jáne halyqty áleýmettik qorǵaý vıse-mınıstri Erbol Ospanov málim etti, dep habarlaıdy Almaty-akshamy.kz Inform.kz-ke silteme jasap.
«Búginde áleýmettik qorǵaý jáne eńbek salasy boıynsha 45 qyzmettiń 43-i (95%) elektrondyq formatta kórsetiledi. Sonymen qatar, atalǵan 45 qyzmettiń 23-i proaktıvti túrde usynylady. Jalpy, bıyl qazaqstandyqtar 13,1 mln qyzmet aldy. Onyń ishinde 10,6 mln qyzmet sıfrlyq formatta, al 1 mln-nan astam qyzmet azamattarǵa jiberilgen habarlama jaýaptary negizinde proaktıvti túrde kórsetildi», - dedi Erbol Ospanov Ortalyq komýnıkasıalar qyzmeti alańynda ótken baspasóz máslıhatynda.
Mınıstr orynbasarynyń málimdeýinshe, 2020 jyldan beri sıfrlyq formatta kórsetiletin áleýmettik qyzmetterdiń úlesi 20%-ǵa artqan.
«Búginde áleýmettik memlekettik qyzmetterdi kórsetý prosesin transformasıalaý júrip jatyr. Aldymen, proaktıvti formatta kórsetiletin qyzmetterdi jetildire túsý kózdelip otyr. Proaktıvti qyzmettiń arqasynda járdemaqylardy avtomatty túrde taǵaıyndaý múmkindigi bar, ıaǵnı qyzmet adamnyń qatysýynsyz, avtomatty túrde kórsetiledi. Sondaı-aq, 2023 jyly 1 qańtardan bastap «Altyn alqa» jáne «Kúmis alqa» alqaǵa ıe kóp balaly analarǵa járdemaqy taǵaıyndaýdy proaktıvti qyzmet túrine aýystyrý josparlanyp otyr. Basynda pılottyq rejımde iske qosylady», - deıdi ol.
Sondaı-aq, Erbol Ospanov kelesi jyly taǵy tórt qyzmettiń avtomatty formatqa aýysatynyn aıtty.