2026 jylǵa josparlaǵan Lývrdaǵy qazaq óneriniń kórmesi aıasynda «Altyn adam» tarıhı jádigeri kelýshilerdiń nazaryna usynylmaq, dep habarlaıdy Almaty-akshamy.kz QazAqparatqa silteme jasap.
«Altyn adam» – Qazaqstannyń eń qundy jádigeri, eldigimizdiń sımvoly. Buǵan deıin atalǵan jádigerdi halyqaralyq deńgeıde ulttyq brendke aınaldyrý maqsatynda «Altyn adamnyń álem mýzeılerine sherýi» halyqaralyq jobasy álemniń 12 memleketinde júzege asty. 2026 jyly Fransıadaǵy Lývr mýzeıinde Qazaqstannyń ulttyq kórmesin uıymdastyrý aıasynda «Altyn adam» men mýzeıdegi tarıhı qundylyǵy bar zattar jádigerlerdi irikteý komısıasyna usynylady», - delingen QazAqparat tilshisiniń saýalyna Ulttyq mýzeıdiń jaýabynda.
Eske sala keteıik, bıyl aqpanda Mádenıet jáne sport mınıstri Asqat Oralov Lývrda qazaq ónerniń kórmesi ótetini týraly aıtqan edi.
«Qos memleket basshylarynyń kezdesýinde 2025-2026 jyldary Fransıada qazaq mádenıetiniń kúnderin ótkizý týraly sheshim qabyldandy. Búgin biz Lývrda qazaq óneriniń kórmesin, sondaı-aq artıserimiz ben shyǵarmashylyq ujymdarymyzdyń qatysýymen Parıjde aýqymdy konsert ótkizý múmkindigin talqyladyq. Bul mádenıet qaıratkerleri úshin qundy tájirıbe bolady dep sanaımyn», - degen edi mınıstr.