Almatyda «Dostyq úıinde» IýNESKO jáne ISESKO isteri jónindegi QR Ulttyq Komısıasy, Túrki mádenıeti men murasy qory, QR Beızattyq mádenı mura jónindegi ulttyq komıteti jáne M.O.Áýezov atyndaǵy Ádebıet jáne óner ınstıtýty 2024 jyly 17-18 qazanda «Túrki halyqtarynyń rýhanı murasy álemdik órkenıet aıasynda: «Alpamys batyr» jyry» atty halyqaralyq ǵylymı-teorıalyq konferensıa ótip jatyr, dep habarlaıdy aqshamnews.kz tilshisi.
Konferensıa barysynda «Alpamys batyr» jyrynyń qazaq, orys jáne aǵylshyn tilderindegi basylymy tanystyryldy. Sonymen qatar Túrki halyqtaryna ortaq mura retinde osy jyrdy IýNESKO kóleminde Materıaldyq emes mádenı mura tizimine engizý jónindegi másele talqyǵa tústi.
Alqaly jıynǵa Túrkıa, Ázerbaıjan, Reseı Federasıasy (Ýfa, Qazan, Novosıbırsk), Qyrǵyz Respýblıkasy, Ózbekstan elderiniń jáne Qazaqstannyń tanymal epostanýshy fólklorıst ǵalymdary qatysyp, tómendegi taqyryptar boıynsha baıandama jasap bastady. Dálirek:
● «Alpamys batyr» jyrynyń ulttyq jáne álemdik keńistiktegi tarıhı-mádenı jáne ǵylymı mańyzy;
● Epıkalyq týyndylardaǵy álemniń semıotıkalyq jáne tildik beınesi;
● Epıkalyq dástúr jáne jyrshylyq óner: ótkeni men búgini;
● «Alpamys batyr» jyryn zertteýdiń pánaralyq túrli aspektileri;
● «Alpamys batyr» jyrynyń túrkilik nusqalarynyń erekshelikteri;
● Fólklorlyq mura jáne qazirgi zaman.
Konferensıaǵa qatysýǵa otandyq jáne sheteldik ǵalymdar, epostanýshylar, fólklortanýshylar, tiltanýshylar, ádebıettanýshylar, tarıhshylar, ónertanýshylar, fılosoftar, mádenıettanýshylar, JOO oqytýshylary shaqyryldy.
Konferensıa moderatory QR UǴA akademıgi, M.O.Áýezov atyndaǵy Ádebıet jáne óner ınstıtýty Bas dırektory Kenjehan İslámjanuly óz sózinde:
«Alpamys batyr» jyryn álemdik dárejege kóterý qajet. Jalpy bul jyrlardy keńestik kezeńde álemdik qaýymdastyq aldynda tanytý, taratý, zertteý bizdiń aldymyzǵa qoıylmaǵan-tuǵyn. Búginde IýNESKO qataryna qosylǵannan keıin, rýhanı muralarymyzdy álemdik deńgeıde kóterip óz ornymyzdy alýymyz kerek. Bul máseleler tóńireginde isteletin jumystar jeterlik. Bul jumysymyzdyń bastaýy dep esepteımiz. Mundaı halyqaralyq jıyndardy júıeli túrde ótkizgen jón, – dedi.
İs-sharanyń mán-maǵynasy týraly oı-pikir aıtyldy.
"Almatyda Túrki mádenıetine baılanysty óte keremet jıyn bastaldy. Materıaldyq emes qundylyqtardy zerttep dáripteý boıynsha eń bir mańdaı aldy ǵalymdar bas qosyp otyr. İs-shara maqsaty – túrki mádenıetin qorǵaý, dúnıege nasıhattaý. Bul ıgi bastama dúnıejúzine belgili «Alpamys batyr» jyrynan bastaý alady. Qundy rýhanı muralardy dáripteı bergen jón", – dedi Túrki Mádenıeti jáne murasy qory basshysy Aqtoty Raıymqulova.