Profılaktıkalyq medısına akademıasynyń prezıdenti, Amerıka densaýlyq saqtaý qaýymdastyǵynyń múshesi Almaz Sharman vaksınaǵa qarsy toptyń ýájderine jaýap berdi, dep habarlaıdy almaty-akshamy.kz QazAqparatqa silteme jasap.
«Keıbir antıvakserler vaksınalardaǵy qandaı da bir zıandy hımıalyq zattardyń bolýyna alańdaý qajet degen qaýesetti taratýda. Olardan mundaı ýáj estý qıyn, ózderi tek qana organıkalyq tamaq jep, Tıbettiń aýasymen dem alyp, Alpi sýyn iship júrgen joq. Álemde 100 paıyz qaýipsiz eshteńe joq. Tipti qarapaıym nan glútenge qarsy kórsetilimi bar adamdardy aýyr jaǵdaıǵa, keıde ólimge ákelýi múmkin. Vaksınaǵa qarsy adamdar kóp mólsherde qabyldaıtyn bıologıalyq belsendi qospalar men dári-dármekterdiń janama áserleri bolýy múmkin. Sonymen qatar, qazirgi vaksına óndirisi tazartý dárejesi men óndiristik qaýipsizdiktiń barlyq talaptaryn saqtaý boıynsha joǵary deńgeıde», – dep jazdy dáriger Facebook paraqshasynda.
Onyń aıtýynsha, vaksınaǵa narazy toptyń taǵy bir argýmenti – qazirgi vaksınalaýdy tolyq aıaqtalmaǵan vaksınalar eksperımentine qaýipti qatysý dep esepteıdi.
«Olaı bolsa, 120 jyl buryn shyqqan aspırınniń qanǵa áseri týraly klınıkalyq zertteýler áli de júrgizilip keledi. Antıvakserlerdiń osy pikirine súıensek, planetadaǵy mıllıardtaǵan adamdar aspırındi synaýda «tájirıbelik qoıan» bolǵan. Qazirgi ýaqytta COVID-19 – aldyn alýǵa bolatyn aýrý. Vaksına 100 paıyz bolmasa da, koronavırýs ınfeksıasynan jaqsy qorǵaıdy jáne aýrýdyń aýyr ótýiniń aldyn alady. Árıne, vaksınanyń ózi kovıdti týdyrmaıdy. Qazirgi ýaqytta álemde 4 mıllıard doza túrli vaksınalar salyndy jáne vaksınadan týyndaǵan koronavırýs ınfeksıasynyń birde-bir jaǵdaıy bolǵan joq. Vaksına alǵandar is júzinde kovıdten qaıtys bolmaıdy», – deıdi A.Sharman.
Sonymen birge, vaksınalar reprodýktıvti buzylýlar men jańa týǵan nárestelerdegi deformasıalardyń damýyna ákelmeıdi. Kerisinshe, kovıdpen aýyratyndarda bedeýlik, belsizdik, shala týý, sondaı-aq mıdyń, júrektiń jáne basqa organdardyń sozylmaly buzylýy, aqyl-oı qabiletiniń tómendeýi qaýpi bar.
«Qazir kún saıyn 7 myńnan astam qazaqstandyq koronavırýs juqtyryp, 150-den astam naýqas qaıtys bolýda. Bul – úlken tragedıa, eger kóptegen adamdar halyqty adastyrmaǵanda jáne kópshiligimiz qajetti vaksınalardy ýaqytyly alǵanda, bulaı bolmas edi. Ókinishke oraı, Qazaqstanda halyqtyń 80 paıyzdan astamy koronavırýsqa qarsy ekpe saldyrǵan joq. Bul onyń taralýy men mýtasıasy úshin óte qolaıly orta. Mundaı jaǵdaı áli de jalǵassa, koronavırýstyń juqpaly jáne agressıvti nusqalaryna baılanysty indettiń jańa tolqyndaryna tap bolamyz. Jeńildegen karantındik sharalar kezindegi vaksınalaý prosesi asa juqpaly koronavırýstyń vaksınaǵa tózimdi jańa nusqalaryn qalyptastyrýǵa yqpal etedi. Sebebi bul vırýstyń tabıǵı prosesi. Azamattardyń basym kópshiligi, shamamen 80 paıyzy vaksına alǵansha karantın sharalaryn álsiretýge bolmaıdy», – deıdi ol.