Bul úshin adam resýrstaryna qomaqty ınvestısıalar qajet.
Óńirlik komýnıkasıalar qyzmeti alańynda sóz sóılegen Qazaqstannyń Profılaktıkalyq medısına akademıasynyń prezıdenti Almaz Sharman eldegi epıdemıologtardyń tapshylyǵyn rastady. Alaıda, ǵalymnyń aıtýynsha, qazirgi kezde ǵylym men medısına baǵytyn qalpyna keltirýdiń múmkindigi bar, dep habarlaıdy Almaty-akshamy.kz.
Almaz Sharmannyń aıtýynsha, qazirgi indet eldegi epıdemıanyń álsiz tustaryn kórsetti. Immýnolog qazirgi kezde kadr tapshylyǵyna baılanysty epıdemıologıalyq baqylaý máselelerin sheshý óte qıyn degen pikirde.
«Men 40 jyldyq tájirıbesi bar ımmýnologpyn jáne óz kezeńinde jumys istegen epıdemıologtar men vırýsologtardyń qandaı ekenin bilemin. Ókinishtisi sol, qazir olardyń kópshiligi qyzmette emes. Qyzmettiń bul salasy óte mańyzdy. Sondyqtan biz jarty jyl buryn dárigerler tobymen densaýlyq saqtaý júıesin jańǵyrtý, buryn bolǵan gıgıena jáne epıdemıologıa mektebin qaıta qurý týraly úndeý tastadyq. Bul bolashaqta epıdemıa jaǵdaıynda epıdemıologtar men vırýsologtardyń myqty kadrlyq áleýetin qalyptastyrý úshin qajet. Alaıda biz úshin bul sala búgin qajet. Sondyqtan qazirgi ýaqytta epıdemıanyń taralýyn jaqsy qadaǵalap, kásibı mamandarmen vırýsty jeńe alatyn epıdemıologtar daıarlanýda», – dedi Almaz Sharman.
Ǵalym el aýmaǵynda buryn bolǵan áleýettiń joǵalǵanyn ókinishpen eske aldy. Biraq qazir ony qalpyna keltirýdiń erekshe múmkindigi bar. Bul úshin adam resýrstaryna qomaqty ınvestısıalar qajet.
«Medısınalyq ýnıversıtetterde epıdemıologıa jáne profılaktıkalyq medısına máselelerimen tikeleı aınalysatyn qoǵamdyq densaýlyq saqtaý mektepterin qaıta qurý qajet. Bul óte mańyzdy: biz aýrýlardyń aldyn alýǵa neǵurlym kóp ınvestısıa salsaq, adamdar soǵurlym az aýyrady jáne emdeýge az qarjy jumsalady», – dedi Almaz Sharman.