Almaty qalasynyń Túrksib aýdanyndaǵy №20 mektepte jańa oqý korpýsy salynbaq.
Bul joba oqýshylar sanynyń artyp kele jatqanyn eskere otyryp, balalarǵa qolaıly ári qaýipsiz bilim berý ortasyn qalyptastyrýǵa jáne aýdannyń bilim berý ınfraqurylymyn damytýǵa baǵyttalǵan, - dep habarlaıdy Aqshamnews.kz.
Sońǵy jyldary atalǵan mektepte oqýshylar sany eki ese artqan. Mektep dırektory Gúlnara Sársenbaevanyń aıtýynsha, sońǵy bes jyl ishinde oqýshy sany 600-den 1200-ge deıin kóbeıgen. Al mektep ǵımaraty nebary 700 oqýshyǵa ǵana eseptelgen.
«Jyl saıyn oqýshylar sany 30–35% ósip keledi. Eger jaqyn mańda jańa úıler salynyp, qonystaný jalǵasatyn bolsa, bul kórsetkish arta túsedi. Ǵımarattaǵy oryn tapshylyǵyna baılanysty muǵalimder qosalqy bólmeler men garderobtardy synyp retinde paıdalanýǵa májbúr. Bul – bilim berý úderisine múlde sáıkes kelmeıtin jaǵdaı», — dedi mektep dırektory.
Úzilis kezinde de qıyndyqtar kóp. Ekinshi qabattaǵy 10 synyptan bir ýaqytta 30–35 oqýshy shyqqanda, dálizderde adam syımaı ketedi. Muǵalimder balalardyń qaýipsizdigin qamtamasyz etý úshin úzilis ýaqytynda dálizde kezekshilik etedi.
Sondaı-aq, mektepte qazirgi zamanǵa saı oqý qural-jabdyqtarynyń jetispeýshiligi qosymsha bilim berýdi uıymdastyrýdy qıyndatyp otyr. Oqýshylar sany 2021 jyldan bastap kúrt ósken. Sol jyly Qaırat yqsham aýdany Túrksib aýdanynyń quramyna qosylǵan bolatyn. Sodan beri osy mektepke balalaryn bergisi keletin ata-analar sany artqan.
Ata-analar mektepke jańa korpýs salý qajettigin qoldaıdy. Olardyń aıtýynsha, oqý jaǵdaıynyń qaýipsiz ári jaıly bolýy úshin keńeıtý jumystary aýadaı qajet.
Mektep qamqorshylyq keńesiniń múshesi Natalá Perepólkına (eki balasy 9 jáne 10-synypta oqıdy) óz pikirin bylaı bildirdi:
«Bizdiń otbasymyz birneshe urpaq boıy osy mekteppen baılanysty. Munda meniń kúıeýim men enem oqyǵan. Jóndeý júrgizilgenimen, ǵımarat eskirgen jáne qazirgi oqýshylar sanyn kótere almaıdy. Úzilis kezinde dálizde adam syımaıdy, keıbir synyptarda 35 oqýshydan oqıdy. Jetkiliksiz oryndarǵa baılanysty sabaqtar keıde akt zalynda ótedi nemese bir kabınette eki pán qatar júrgiziledi. Ol bólme bar bolǵany 12 adamǵa arnalǵan. Sanıtarlyq toraptar da jetispeıdi, balalar uzyn-sonar kezekke turýǵa májbúr».
Jańa korpýs salý úshin 41 jer telimin satyp alý prosedýrasy bastaldy. Bul jumystar Qazaqstan Respýblıkasynyń zańnamasyna sáıkes, azamattardyń quqyqtary men zańdy múddelerin saqtaı otyryp, ótemaqy tóleý jáne tıisti habarlama berý arqyly júrgiziledi.
Jer telimderin memleket qajetine satyp alý merzimin naqty aıtý múmkin emes – ár jaǵdaı jeke qaralady. Bul prosestiń uzaqtyǵy menshik ıeleriniń sanyna, usynylǵan sharttarmen kelisýine jáne sot talqylaýlarynyń bolýyna baılanysty.
Jobanyń basty maqsaty - ósip kele jatqan oqýshylar sany bar aýdanda sapaly jáne qoljetimdi bilim berý júıesin qamtamasyz etý.
Aýdan turǵyndary men ata-analar jańa korpýs salýdyń mańyzdylyǵymen tolyq kelisedi. Sonymen birge, olar bul máseleni sheshý barysynda bılik, turǵyndar jáne qoǵam arasynda ashyq dıalog bolýy kerek ekenin atap ótýde. Bul - balalar úshin zamanaýı bilim berý jaǵdaılaryn jasaı otyryp, qalyptasqan qaýymdastyqtarǵa zıan keltirmeıtin ońtaıly sheshim tabýdyń kepili.
