Halyq máseleni qala ákimimen kezdesý kezinde kótergen
Almatynyń Túrksib aýdanynda temir jol boıynan jańa jerústi ótkeli salynbaq, dep habarlaıdy Almaty-akshamy.kz Almaty.tv-ge silteme jasap.
Shaskıı jáne Erjanov kósheleri mańynan jasalatyn kópirdiń qurylysy kelesi jyly aıaqtalmaq. Qaladaǵy shoıyn joldyń basym bóligi Túrksib aýdanynda ornalasqandyqtan turǵyndar temir joldy kesip ótýge májbúr. Jergilikti halyq bul máseleni qala ákimi Erbolat Dosaevpen kezdesý kezinde de kótergen. Endi jurtshylyqtyń talap-tilegi oryndalmaq.
Bul – Úlken Almaty kanaly janyndaǵy shoıyn jol. Súıinbaı kóshesi boıynda ornalasqan temir joldyń uzyndyǵy – 5 shaqyrym. Munda turǵyndar úshin arnaıy ótkel jasalmaǵan. Saldarynan jyl basynan beri shoıyn joldy zańsyz kesip ótýdiń 50-ge jýyq deregi tirkelipti. Kóliktegi polısıa departamenti mamandary turǵyndarǵa túsindirý jumystaryn júrgizse de, ony eskeretinder az deıdi.
«Almaty-1 jelilik basqarmasynyń jelilik polısıasynyń qyzmet kórsetý aımaǵynda 9 jazataıym oqıǵa oryn aldy. Onyń ishinde Almaty-1, Almaty-2 stansasynda 6 jazataıym oqıǵanyń beseýi qaıǵyly jaǵdaımen aıaqtaldyn», – dedi Almaty-1 stansasyndaǵy jelilik polısıa basqarmasynyń aǵa ınspektory Aqmaral Aqmoldaeva.
Aýdan turǵyndary balalarynyń ómiri úshin alańdaıdy. Sebebi oqýshylar mektepke barý úshin temir joldyń arǵy betine ótedi. Endi jańa jerústi ótkeliniń salynatynyn estigen kópshilik rızashylyǵyn bildirip jatyr.
«Shaǵyn aýdanda 2 mektep bar. Oqý jyly bastalǵanda tańerteń balasyn ertip alǵan ata-ana men oqýshylar osy jolmen ótedi. Basqa aınalyp óter jol joq. Kópir salynsa, turǵyndar ıgiligin kórer edi», – dedi qala turǵyny Vıktorıa Shýlgına.
Jol boıynda poıyz turyp qalǵanda turǵyndar vagonnyń astymen ótýge de májúr bolady eken. Bul ásirese balalar men egde jastaǵy turǵyndar úshin asa qaýipti.
Aýdan ákimdigi máseleden habardar. Turǵyndar bul suraqty qala ákimi Erbolat Dosaevpen kezdesý kezinde de kótergen. Túıtkildi qala basshylyǵy kóp uzamaı sheship beretinin aıtty. Jaýapty sala mamandaryna birden tapsyrma júkteldi. Keler jyly jerústi ótkeliniń qurylysy bastalady.
«Jobalyq-smetalyq qujattary qazir memlekettik saraptamadan ótip jatyr. saraptamadan ótken soń, qurylys jumystary memlekettik búdjetten aqsha bólingennen keıin 2023 jyly bastalady. Qurylys jumysy qalalyq mobıldilik basqarmasynyń kelisimsharty boıynsha 1 jyl ýaqyt júrgiziledi», – dedi Túrksib aýdandyq kóriktendirý bóliminiń bas mamany Sáken Baıasyl.
Qazaqstan temir joly» UK» málimetinshe, Almatyda bıyl jyl basynan beri shoıyn joldy durys ótpegeni úshin 7 adamdy poıyz qaqqan. Onyń beseýi qaıǵyly jaǵdaımen aıaqtaldy.