Jolaýshylar edenge qulady
2022 jyldyń 26 shildesinde Almatyda №38 marshrýttyq avtobýstarynyń birinde oqys oqıǵa oryn aldy, dep habarlaıdy Almaty-akshamy.kz Zakon.kz-ke silteme jasap.
Avtobýs Saın kóshesiniń boıymen soltústik baǵytqa qaraı jyljyp kele jatqan. Shamamen saǵat 11:10-da júrgizýshi tejegishti shalt basyp, saldarynan salondaǵy jolaýshylar edenge qulady.
Olardyń biri – 1947 jylǵy áıel kóptegen dene jaraqatyn alyp, №7 qalalyq klınıkalyq aýrýhanaǵa jetkizildi.
Áleýmettik jelide týystarynyń jazýynsha, ájeı jansaqtaý bólimine túsken. Onyń alty qabyrǵasy synyp, bas-mı jaraqaty, keýde tusynyń kógerýi, mıyna qan ketýi syndy zardapqa tap bolǵan.
Týystarynyń aıtýynsha, avtopark ákimshiligi olarmen baılanysqa shyqpaǵan.
Almaty qalasy PD baspasóz qyzmeti bul fakti Áýezov aýdanynyń PB tergeýge alǵanyn habarlady. Tıisti saraptamalar taǵaıyndalatyn bolady. Júrgizýshiniń áreketine quqyqtyq baǵa beriledi.
Almatyelektrotrans tergeý sharalary aıaqtalǵannan keıin túsinikteme beretinin jetkizdi.