Qala basshysy Erbolat Dosaev Túrksib aýdanyn aralap, turǵyndarmen kezdesý barysynda áleýmettik ortalyqtyń jumysymen tanysty, dep habarlaıdy almaty-akshamy.kz.
Munda aýdandyq Ardagerler keńesi, múgedekter qoǵamy, Almaty qalasynyń Ortalyqtandyrylǵan kitaphana júıesiniń fılıaly men kún saıyn 50 adamǵa deıin qamtıtyn az qamtylǵan otbasylardan shyqqan balalarǵa qosymsha bilim beretin "Shyńǵa Órleý" áleýmettik klýby ornalasqan. Sondaı-aq, ǵımaratta aýdannyń otbasyn qoldaý ortalyǵy ashylady.
Buǵan deıin bul uıymdar aýdannyń túrli bóliginde, ár túrli sanattaǵy adamdar úshin beıimdelmegen bólmelerde bolǵan.
Ortalyq 2017 jyldan beri bos turǵan ǵımaratta ornalasqan. Kúrdeli jóndeý jumystary kezinde irgetas pen qabyrǵalary nyǵaıtylyp, ınjenerlik jeli júıesi júrgizildi. Sonymen qatar, aýmaqty abattandyrý jumysy júrgizildi.
Jańa formattaǵy Áleýmettik ortalyq Alataý aýdanynda da jumys isteıdi. Megapolıs basshysy Erbolat Dosaev beıindi basqarmalarǵa bul tájirıbeni barlyq aýdandarǵa masshtabtaý úshin osyndaı ortalyqtardyń úlgilik jobasyn ázirleýdi tapsyrdy.
