Almatynyń Túrksib aýdanynyń joldarynda bıyl 160 «Sergek» kamerasy ornatyldy.
Túrksib aýdanynyń jol ınfraqurylymyn damytý, jolaýshylar tasymalynyń sapasyn arttyrý jáne jol qaýipsizdigin qamtamasyz etý jumystary týraly Almaty ákimi Erbolat Dosaev aýdan turǵyndarymen kezdesý kezinde aıtty, dep habarlaıdy aqshamnews.kz
Qala basshysynyń aıtýynsha, bıyl qazan aıynyń sońyna deıin 39 kóshede 41,7 km joldyń ortasha jóndeý jumystary aıaqtalady. Qazirgi ýaqytta 18 kóshede 30 km jol jóndeldi.
«Aýdanǵa qosylǵan shaǵyn aýdandardyń jol ınfraqurylymyn damytýǵa erekshe nazar aýdarylýda. Máselen, «Álmerek» jáne «Qaırat» shaǵyn aýdandarynda 13 kóshede 13 km jańa jol salynyp jatyr. Búgingi kúnge deıin 5 kóshede 5,3 km jol salý jumystary aıaqtaldy. Sonymen qatar, qazan aıynyń sońyna deıin «Jas Qanat» shaǵyn aýdanynda 19 kóshede 2,5 km jol salý jumystaryn bastaý josparlanýda. Jumystardy 2025 jyldyń 2-toqsanynda aıaqtaý josparlanǵan», – dedi Erbolat Dosaev.
Kezdesý barysynda qala ákimi aýdannyń jol qaýipsizdigin qamtamasyz etý boıynsha atqarylyp jatqan jumystarǵa da nazar aýdardy.
Mysaly, bıyl qosymsha 160 «Sergek» kamerasy ornatyldy. Sonyń nátıjesinde aýdandaǵy kameralardyń jalpy sany 816-ǵa jetip, jol qozǵalysy erejelerin buzýdyń aldyn alý men baqylaýdy kúsheıtti.
Erbolat Dosaev sondaı-aq, bıyl Túrksib aýdany arqyly ótetin 10 marshrýtta 195 avtobýstyń jańartylǵanyn atap ótti. Bul kútý ýaqytyn orta eseppen 15 mınýttan 7 mınýtqa deıin qysqartýǵa múmkindik berdi. Jyl sońyna deıin aýdan aýmaǵynda 5 jańa qala mańy marshrýtyn iske qosý josparlanǵan.
Sonymen qatar, jańa oqý jyly bastalǵaly beri «Mektep avtobýsy» jobasy aıasynda aýdanǵa qosylǵan avtobýstar sany 8-den 25-ke deıin ulǵaıtyldy, bul 8 mektepten 2 myńnan astam oqýshyny tasymaldaýǵa múmkindik berdi.
Aıta keteıik, mektep avtobýstary Almatyda 2023 jyly ákimdik jobalyq keńsesiniń aıasynda, alys ornalasqan mektepterde oqıtyn kishi jastaǵy oqýshylardyń jaılylyǵy men qaýipsizdigin qamtamasyz etý úshin iske qosylǵan bolatyn.