Almaty ákimi Erbolat Dosaev beıindi basqarmalardyń, Tótenshe jaǵdaılar departamenti, jer resýrstaryn basqarý departamentiniń jáne t.b. qatysýymen taý bókterindegi qurylysty retteý máselesi boıynsha keńes ótkizdi.
Esterińizge sala keteıik, Almatyda Erbolat Dosaevtyń tapsyrmasymen taýly aımaqtary jáne taý bókterindegi qurylysty baqylaý kúsheıtildi. 2022 jyly maýsymda máslıhat eńisi 15 gradýstan asatyn betkeıde qurylysqa tyıym salatyn aýmaqtyń fýnksıonaldyq aımaqtaryn salýdyń qala qurylystyq reglamentterin iske asyrý josparynda ákimdik bastamashylyq etken ózgeristerdi bekitti.
Qabyldanǵan ózgerister Almaty qalasynyń 2040 jylǵa deıingi Bas josparynda jáne egjeı-tegjeıli josparlaýdyń jańa jobalarynda kórinis tapty, qala turǵyndary jáne sarapshylardyń qoǵamdyq talqylaý qorytyndysy boıynsha oǵan birqatar usynys engizildi. Sonyń biri taý bókterindegi 4 270 gektardan astam jerdi qurylysqa tyıym salý úshin rekreasıalyq aımaqtarǵa aýystyrý.
Qala qurylysy jáne ýrbanıstıka basqarmasy halyqtyń ótinishimen taý bókterindegi nysandardy jobalaýǵa topyraqtyń ınjenerlik-geologıalyq izdestirý kezinde bastapqy derekterdi beredi. Almaty qalasy qala qurylysyn baqylaý basqarmasynyń málimetinshe, 2022 jyly 36 nysan, 2023 jyly – 89 jáne bıyl 32 nysan salýǵa ruqsat berilmegen.
Bul rette, keńeske qatysýshylar atap ótkendeı, búginde barlyq qurylys salýshy jobalyq sheshimderdi saqtamaıdy. Tájirıbe kórsetkendeı, keıbireýler tek ruqsat qujattamasyn alý úshin ınjenerlik-geologıalyq topyraqty izdestirýdi júrgizedi. Taýly jerlerde zańsyz qurylys júrgizgen 54 faktisiniń 46-sy sotqa berildi, onyń 30-y qalanyń paıdasyna sheshildi, búginde onyń 5-inde nysandar buzyldy.
Keńes qorytyndysy boıynsha qala ákimi Erbolat Dosaev sáýlet jáne qala qurylysyn qadaǵalaý organdaryna, aýdan ákimdikterine taý bókterindegi aýmaqtarda óz betinshe qurylys salýǵa turaqty túrde monıtorıń júrgizýdi tapsyrdy. Sondaı-aq Memleket basshysynyń tapsyrmasymen ázirlenip jatqan QR Qurylys kodeksine jeke turǵyn úıler qurylysynyń barysyn tekserý múmkindigi bóliginde qala qurylysyn baqylaý organdarynyń ókilettigin kúsheıtý jóninde usynys engizilsin. Jer resýrstaryn basqarý departamenti – jer zańnamasynyń saqtalýy úshin jer telimderine tekserýler júrgizsin.