Almaty qalasynyń energetıka jáne sýmen jabdyqtaý basqarmasy jylý magıstraliniń qalpyna keltirilgenin málimdedi, dep habarlaıdy Almaty-akshamy.kz.
«Almatydaǵy Sháripov kóshesinde (Sháripov pen Gogol kósheleriniń qıylysynyń soltústiginde) bolǵan jylý trassasyndaǵy apattyń saldary joıyldy. 11 qarashaǵa qaraǵan túni saǵat 01.50-de «Almaty jylý jelileri» JSHS brıgadasy dıametri 400 mm qubyrdy qalpyna keltirýdi aıaqtady, synaq júrgizilgennen keıin jylý magıstrali paıdalanýǵa berildi jáne túngi saǵat 2.40-ta jylý berý qalpyna keltirildi ári belgilengen rejımde jumys jasaýda», - delingen habarlamada.
Sondaı-aq, Sháripov kóshesindegi kólik qozǵalysy qalpyna keltirildi. Asfálttyń jabyndysyn aýa raıy qolaıly bolǵan jaǵdaıda osy jyldyń 13 qarashasyna deıin qalpyna keltirý josparlanýda.
Kenetten jaǵdaı týyndasa (sý, bý shyǵaryndylary) +7-727-378-06-65 telefony boıynsha «AlTS» JSHS apattyq-dıspecherlik habarlasýdy ári óz betinshe áreket jasamaýdy jáne bolǵan oqıǵa týraly habarlaýdy suraımyz.