Qazaqstanda mopedti tirkeý naýqany jalǵasýda.
Almaty qalasy Ákimshilik polısıa basqarmasy prosesıng ortalyǵynyń málimetinshe, mopedti tirkep, "A1" sanatyndaǵy júrgizýshi kýáligin alǵan azamattardyń sany birtindep artyp keledi, dep habarlaıdy aqshamnews.kz
"Moped júrgizýshileri mynany este saqtaýy kerek. "Jol júrisi týraly" zańǵa ózgertýler men tolyqtyrýlar engizilgennen keıin mopedter resmı túrde kólik quraly retinde tanyldy. Demek endi olardy júrgizý úshin tıisti sanattaǵy júrgizýshi kýáligi, saqtandyrý polısi bolýy kerek. Polısıa barlyq moped ıelerine tirkeýdi keshiktirmeýdi qatań túrde usynady, óıtkeni jańa erejelerdi saqtamaý ákimshilik jaýapkershilikke ákep soǵady. Zańdy saqtaý – bul jaı ǵana formaldylyq emes, jol qaýipsizdigi máselesi. Ýaqytynda tirkelip, kóligińizdi zańdy túrde júrgizińiz", - dedi Almaty qalalyq PD ákimshilik polısıa basqarmasynyń bastyǵy Asqat Qulbaev.
Mopedti tirkeý úshin ıesi (ıesiniń ókili) mynalardy kórsetedi: - jeke basyn kýálandyratyn qujat (tulǵany sáıkestendirý úshin) nemese sıfrlyq qujattama qyzmetinen elektrondy túrde; - Salyq kodeksiniń 553 jáne 615-baptarynda kózdelgen SJTJ, MTNB bergeni úshin tirkeý alymy men memlekettik bajdyń tólengenin rastaıtyn qujattar. (0,25 AEK nemese 983 teńge, SJTJ berý úshin – 1,25 AEK nemese 4915 teńge jáne MTNB berý úshin – 1,4 AEK nemese 5505 teńge); - QR İİM 02.12.2014 jylǵy №862 buıryǵymen bekitilgen Kólik quralynyń sáıkestendirý nómiri boıynsha kólik quraldarynyń jekelegen túrlerin memlekettik tirkeý jáne esepke alý qaǵıdalarynyń 16-qosymshasyna sáıkes mopedti memlekettik tirkeýge ótinish. - tehnıkalyq qujat (bar bolsa) nemese mopedtiń tehnıkalyq sıpattamalary týraly aqparat; - mopedke sáıkestendirý nómiri bolmaǵan jaǵdaıda sáıkestendirý nómirin tirkeý is-sharalary júrgizilgenge deıin moped ıesiniń ótinishi boıynsha jol qozǵalysy qaýipsizdigin qamtamasyz etý jónindegi ýákiletti organ beredi; - Qaǵıdalarǵa 12-qosymshaǵa sáıkes kólik quralyn tekserý aktisi (kólik quralyn bastapqy tirkeý kezinde); - burynǵy SJTJ jáne MTNB (bar bolsa); - menshik ıesiniń ókili júgingen jaǵdaıda kelisim nemese senimhat.