Almatynyń polısıasy jazǵy kanıkýl kezinde balalardyń qaýipsizdigin qamtamasyz etedi
Almatynyń Óńirlik komýnıkasıalar qyzmetinde balalardyń jaz maýsymyndaǵy qaýipsizdigine arnalǵan pres-konferensıa bolyp ótti. Oǵan Almatynyń Polısıa Departamentiniń Jergilikti polısıa qyzmeti bastyǵynyń orynbasary Aıtan Eleýsizov qatysty.
Spıkerdiń aıtýynsha, jazǵy kanıkýl kezinde, ásirese qalalyq jerde oqys oqıǵa qaýpi artady. Almatyda osyndaı jaǵdaıdyń aldyn alý úshin byltyrdan beri mekemeler arasyndaǵy yqpaldastyqty arttyryp, qoǵamdyq baqylaýdy kúsheıtýdi kózdeıtin is-sharalar qolǵa alynǵan.
«2024-2025 jyldary qabyldanǵan is-sharalardyń arqasynda qaýip-qaterdi barynsha báseńdetip, qaladaǵy 266 myńnan astam balanyń tolyqqandy demalýyna jaǵdaı jasadyq»,- dep atap ótti Aıtan Eleýsizov.
Polıseılerdiń taǵy bir mindeti – joldaǵy qaýipsizdikti qamtamasyz etý. Jaz kezinde olar jas ınspektorlarmen birge oıyn-saýyq mekemelerin baqylap, balalar kóp júretin mektep, saýda oryndary men vokzal mańyn tekserip, reıd jasaǵan.
«Balalar lageri men demalys oryndarynyń árqaısysynda bekitilgen bir-bir bólimshe polıseıi men ıývenaldy polısıa qyzmetkeri bar. Olar kez kelgen jaǵdaıda jyldam qımyldap, oqys oqıǵanyń aldyn alýǵa tyrysady,- dedi Aıtan Eleýsizov. Býllıng pen kıberbýllıngtiń aldyn alyp, jasóspirimder jasaǵan nemese jasóspirimderge jasalǵan zańyz árekettiń jolyn kesý de polısıanyń mindetine kiredi.
Jıyn barysynda, jergilikti polısıa qyzmeti bastyǵynyń orynbasary ata-analarǵa ótinish jasady.
«Ata-analar jaǵy balalarynyń qaıda, qaı jerde júrgenin qadaǵalap, olardy únemi baqylap otyrýy kerek. Balalarmen birlesip jol qaýipsizdigi erejesin jattap, qaýip tóngende olarǵa ne isteý kerek ekenin aıtyńyzdar. Eń bastysy – balaǵa shuǵyl qyzmettiń 101, 102, 103 jáne 112 nómirine qońyraý shalýdy úıretińiz»,- dep tolyqtyrdy Aıtan Eleýsizov.
Sonymen birge, polısıa terezeni ashyq qaldyrýdyń da qaýipti ekenin eskertti. Terezege temir jaqtaý ornatyp, nemese terezeni balanyń qoly jete almaıtyndaı etip jasaǵan durys.
Jıynnyń sońyna qaraı, polısıa ókili balanyń qaýipsizdigine eń aldymen ata-anasy jaýapty ekenin taǵy bir ret eske salyp, memlekettik organdar men bilim mekemelerimen birlesip jumys isteý qaýipti azaıtýǵa ǵana kómektesetinin aıtty.