Qalada «Kóneniń kózi» kórmesi ótýde
Munda HİH jáne HH ǵasyrdaǵy qazaqtyń zergerlik áshekeıleri men dástúrli ulttyq kıimderin kórýge bolady. «Kóneniń kózi» kórmesinde kórkemdik-tarıhı mańyzdylyǵy joǵary 100-den asa kóne jádiger qoıylǵan. Munda syrǵa, bilezik, saqına, sholpy jáne alqalardyń túr-túri bar. Tipti aty ańyzǵa aınalǵan kúmis kómeı ánshiler Kúlásh Baıseıitova men Jamal Omarovanyń da áshekeıleri kórmeniń ajaryn asha túskendeı. Halyq ártisi Shara Jıenqulovaǵa kúıshi Dına Nurpeıisova syıǵa bergen qos bilezik te osynda tur, dep habarlaıdy Almaty-akshamy.kz 24.kz-ke silteme jasap.
«Bizdiń qorda 14 myńnan astam áshekeı buıymdar saqtalyp jatyr. Atap aıtqym keletini, osy mýzeıde arheologıalyq qazba jumystarynan tabylǵan buıymdar saqtaýly. Kúltóbeden, Ońtústik Qazaqstannan tabylǵan syrǵa bar. Taza altynnan jasalǵan. Sosyn granatpen áshekeılengen. Sol syrǵa bizdiń kórmege birinshi ret qoıylyp otyr. Bul kóne buıymdardyń kórmede jarqyrap turýy – eń birinshi kezekte restavratorlardyń eńbegi. Mýzeıdiń konservasıalaý bóliminiń qyzmetkerleri kóne buıymdardy qalpyna keltirý úshin birneshe kún boıy kóz maılaryn taýysyp otyryp jumys istegenderin aıtady», - dedi QR Ortalyq memlekettik mýzeıiniń bólim jetekshisi Sholpan Tursynbaeva.
«Bulardy qalpyna keltirgen kezde, ártúrli ádisterdi paıdalanamyz. Eń aldymen zat qandaı jaǵdaıda, qalaı búlingenine qaraı onyń qalpyna keltirý prosesin paıdalanamyz. Tasy túsip qalǵan jerge qaıtadan tas salamyz. Sosyn qaraıyp ketse, ony arnaıy qyshqyldar bar kúmis tazalaıtyn, solarmen tazalaımyz. Uıymdastyrýshylar kórmeniń maqsaty – ulttyq murany saqtaý, nasıhattaý jáne mýzeı qundylyqtaryn jańǵyrtý ekenin aıtady», - deıdi qalpyna keltirýshi Rınat Sonarbaev.