Almatyda kópbalaly analar marapattaldy
Almatynyń Jetisý aýdanynda kópbalaly analarǵa qurmet kórsetildi
Almaty qalasynyń 9 kópbalaly anasy «Altyn alqa» jáne «Kúmis alqa» memlekettik nagradalarynyń ıegeri atandy. Olar Jetisý aýdanynda turady. Qazaqstan Respýblıkasy Prezıdentiniń 2024 jylǵy 6 qyrkúıektegi №645 Jarlyǵyna sáıkes eki ana «Altyn alqa» alsa, taǵy jeti anaǵa «Kúmis alqa» berildi, dep habarlaıdy aqshamnews.kz
«Biz tárbıelep otyrǵan balalarymyz elimiz ben jerimizge qyzmet etse, bul bizdiń maqsatymyzdyń oryndalǵany. Árbir ana balalardyń sanyna ǵana emes, olardyń tárbıesiniń sapasyna da jaýap beredi, óıtkeni bul úlken jaýapkershilik. Qazaqstannyń bolashaǵy jarqyn bolsyn, balalarymyz densaýlyǵy myqty bolyp, elimiz gúldene bersin!», – dedi «Altyn alqa» ıegeri Aıana Álisheva.
«Kúmis alqa» ıegeri, 6 balanyń anasy Gúlzana Halbekova da emosıasyn jasyrmady.
«Men osy sátti uzaq kúttim. Ózim kópbalaly otbasynda óskenmin, biz anamyzdyń meıirimine jáne ákemizdiń qamqorlyǵyna bólenip óstik. Bizdiń balalarymyz da bir-birine qamqorlyq pen jaqsylyq jasaıdy. Meniń oıymsha, beıbit elimiz men kóńili darhan halqymyzdyń arqasynda balalarymyzdy beıbitshilik pen kelisimde tárbıeleı alamyz. Kópbalaly ana bolý baqyt, men ár otbasyǵa osyndaı baqyt tileımin!», – dedi Gúlzana Halbekova.
Jetisý aýdanynyń ákimi Lázzat Jylqybaeva joǵary nagrada ıegerlerin quttyqtap, ulttyń damýyna qosqan úlesteri úshin alǵys bildirdi.
Aýdanda barlyǵy 2 940 kópbalaly ana tirkelgen. Búginde olardyń 154-i «Altyn alqa», 305-i «Kúmis alqa» medaldarymen marapattalǵan. Olardyń qataryna taǵy 9 áıel qosyldy. Kópshiligi bilim berý, medısına jáne basqa da memlekettik jáne jeke qurylymdarda jumys istep, qalanyń damýyna zor úles qosyp keledi.