Jetisý aýdanynyń ákimi Gúlnar Kókebaeva úsh mekteptiń qosymsha ǵımarattarynyń qurylysyn jeke ózi tekseredi. Bul jumystar belsendi júrgizilip jatyr, bul týraly ol Almaty qalasynyń Óńirlik komýnıkasıalar qyzmetiniń brıfıńinde aıtty, dep habarlaıdy almaty-akshamy.kz
Oqýshy ornynyń tapshylyǵyn azaıtý úshin aýdanda úsh mektepte 800 orynǵa arnalǵan qosymsha qurylys jumystary júrgizilýde.
«Qulager yqsham aýdanynda №148 mektepte 300 oryndyq qosymsha qurylys aıaqtaldy. Qazirgi ýaqytta merdiger uıym obektini tapsyrý prosesin júrgizýde», - dep bastady esebin Gúlnar Kókebaeva.
Sonymen qatar, bıylǵy maýsymda mektepterge qosymsha ǵımarattar salý jumystary bastalǵan bolatyn:
– №103 mektepke qosymsha 200 oryn
– №112 mektepke qosymsha 300 oryn
Atalǵan obektiler boıynsha jumysty aıaqtaý merzimi – 2024 jyldyń tamyzy.
G.Kókebaeva aıaqtalǵan nysandar jaıly da esep berdi. Osy jyldyń tamyz aıynda № 101 mektepke 312 oryndyq akt zalynyń qosymsha qurylysy aıaqtaldy jáne bıylǵy qarasha aıynyń basynda №80 mektepti seısmıkalyq kúsheıtýmen kúrdeli jóndeý aıaqtaldy.
Sonymen qatar, aýdanda «Mektep avtobýsy» baǵdarlamasy júzege asyrylýda, onyń aıasynda 5 mekteptiń 1722 oqýshysynyń jaıly avtobýstarmen qatynaýy qamtamasyz etildi.
Aınabulaq shaǵyn aýdanynyń memlekettik balabaqshalarynda oryn tapshylyǵyn azaıtý maqsatynda ótken jyldyń mamyr aıynda qoldanystaǵy qurylysty súrý arqyly 160 oryndyq jańa balabaqshanyń qurylys jumystary bastaldy. Búgingi tańda balalar baqshasynyń qurylysy aıaqtaldy jáne nysandy tapsyrý jumystary júrgizilip jatyr.
Qorytyndylaı kele, aýdan ákimi Almaty qalasyn damytýdyń 2025 jylǵa deıingi baǵdarlamasy sheńberinde jyl sońyna deıin Botkın kóshesi, 16 úı mekenjaıy boıynsha jastar komýnıtı-ortalyǵyn iske qosý josparlanyp otyrǵanyn habarlady.