Kezdesýge Jetisý aýdanynyń ákimi Lázzat Jylqybaeva, memlekettik organdardyń ókilderi, qala ákimdigi basqarmalarynyń mamandary, aýdan kásipkerleri jáne tabıǵatty qorǵaý polısıasynyń qyzmetkerleri qatysty, - dep habarlaıdy aqshamnews.kz.
Jıynda atmosferalyq aýany qorǵaýǵa qatysty jańa ekologıalyq talaptardy is júzinde túsindirý jáne olardy kezeń-kezeńimen engizý tetikterine erekshe nazar aýdaryldy. Kásipkerler tolǵandyrǵan suraqtaryn qoıyp, yqtımal táýekelderdi talqylady.
Almaty qalasy Ekologıa jáne qorshaǵan orta basqarmasynyń basshysy Serik Ádilbaev kezdesýdiń tek túsindirý sıpatynda ótkenin atap ótti.
«Bizdiń mindetimiz – jańa ekologıalyq talaptardyń mánin jetkizý, olardyń ne úshin engizilip jatqanyn túsindirý jáne bızneske táýekelsiz men aıyppulsyz jumys isteý joldaryn kórsetý. Bul qysym kórsetý emes, shyǵaryndylar salasynda kezeń-kezeńimen tártip ornatý máselesi», – dedi ol.
Eske salsaq, Qazaqstan Respýblıkasynyń Ekologıalyq kodeksiniń 206-babyn iske asyrý aıasynda Almaty qalasynyń ákimdigi atmosferalyq aýany qorǵaý qaǵıdalaryn ázirlegen bolatyn. Atalǵan qujat 2025 jyly 30 jeltoqsanda qala máslıhatynda bekitildi.
Qujat tórt negizgi baǵytty qamtıdy: avtokólikterdi paıdalaný tártibin retteý, III sanattaǵy nysandarǵa qoıylatyn ekologıalyq talaptar, shyǵaryndylar deńgeıi tómen aımaqty uıymdastyrý, sondaı-aq qolaısyz meteorologıalyq jaǵdaıda monıtorıń júrgizý, sıfrlandyrý jáne jedel áreket etý sharalary.
Jetisý aýdanynda júrgizilgen monıtorıń nátıjesinde 213 qoǵamdyq tamaqtaný orny, komersıalyq monsha men tehnıkalyq qyzmet kórsetý beketteri, sondaı-aq 76 ónerkásiptik kásiporyn jumys isteıtini anyqtaldy. Onyń ishinde 51 nysan III sanatqa jatady jáne jıyntyǵynda atmosferalyq aýaǵa eleýli júkteme túsiredi.
«Osy jyldan bastap ekologıalyq talaptardyń saqtalýyna turaqty monıtorıń júrgizý kózdelgen. Qazirdiń ózinde paıdalanylyp jatqan otyn men jabdyqty baǵalap, ekologıalyq turǵydan tıimdi sheshimderge kóshýdi josparlaý mańyzdy. Biz bıznestiń jaýapty ári sanaly ustanymyna senim artamyz», – dep sózin túıindedi Serik Ádilbaev.