QR İİM Almaty akademıasynda Baýyrjan Momyshuly atyndaǵy dárisqanada ofıserlik shenderdi tabystaý rásimi ótti.
Jas qyzmetkerler QR İİM Almaty akademıasynyń túlekteri aldynda sóz sóılegen Almaty qalalyq polısıa departamentiniń bastyǵy Arystanǵanı Zapparov saltanatty sharany ótkizý orny kezdeısoq tańdalmaǵanyn atap ótti, dep habarlaıdy Almaty-akshamy.kz Polisia.kz-ke silteme jasap.
«Uly Otan soǵysynyń qatysýshysy, Keńes Odaǵynyń Batyry, Halyq qaharmany, jazýshy Baýyrjan Momyshulynyń qurmetine ashylǵan zalda saltanatty sharanyń ótýi polıseılerdiń óskeleń urpaǵy úshin aıtýly oqıǵa bolmaq. Bizdiń qatarymyzda olar Otanǵa degen súıispenshilikke, erlik pen janqıarlyq rýhta tárbıelenedi. “Elim dep ezilip, jurtym dep jumylyp, elge qyzmet et” degen ulaǵatty sózder tártip saqshylarynyń sımvolyna aınalyp, urpaqtan-urpaqqa jalǵasa beredi. Qurmetti áriptester! Sizderdi alǵashqy ofıserlik shen alýlaryńyzben shyn júrekten quttyqtaımyn. Sizderge zor densaýlyq, otbasylyq baqyt jáne joǵary kásibılik tileımin», – dedi Arystanǵanı Zapparov.