Qazaqstan Jazýshylar odaǵynda Ulttyq kitap kúni aıasynda, jyl saıyn uıymdastyrylatyn «Almatynyń jas jazýshysy – 2025» qalalyq baıqaýynyń jeńimpazdary marapattaldy.
Qazaq tilindegi shyǵarmalar arasynan úzdik dep tanylǵan shyǵarma – Abaı atyndaǵy daryndy balalarǵa arnalǵan mektep-ınternatynyń oqýshysy Shyraılym Aıbekqyzynyń týyndysy. Ol óz áńgimesin Saparǵalı Begalınniń «Aldanǵan jolbarys» atty shyǵarmasynyń negizinde jazǵan.
Al orys tilindegi jumystardyń ishinde eń joǵary baǵany №52 jalpy bilim beretin mekteptiń oqýshysy Renat Bekkýlovtyń «Volshebnoe pýteshestvıe v mır Sapargalı Begalına» atty shyǵarmasy ıelendi.
– Bıylǵy baıqaýǵa 15-17 jas aralyǵyndaǵy 173 oqýshy qatysty. Olar Saparǵalı Begalın shyǵarmalarynyń jelisi boıynsha fentezı janryndaǵy týyndylaryn qazaq jáne orys tilderinde usyndy. Bul baıqaý sóz qadirine boılaǵan, kitapty, rýhanıatty súıetin shyǵarmashyl jetkinshekterdiń jolyn ashyp, shabyt beretini sózsiz. Mereıi ústem bolǵan jastarǵa sáttilik tileımiz, – dedi Almaty kitaphanalary dırektorynyń kitaphana isteri jónindegi orynbasary Lázzat Spataeva.
Baıqaý aıasynda sarapshylar keńesiniń jáne qazylar alqasynyń sheshimimen 15 jasqa deıingi avtorlar úshin arnaıy «Jas daryn – 2025» nomınasıasy taǵaıyndaldy. Bul atalym boıynsha 16 shyǵarma iriktelip alynyp, avtorlar yntalandyrý syılyqtarymen jáne arnaıy sertıfıkattarmen marapattaldy.