Almaty qalasynyń Óńirlik komýnıkasıalar qyzmetiniń alańynda 2007-2008 jylǵy jasóspirimder arasyndaǵy kásibı bokstan Azıadaǵy birinshi týrnırdiń júldegerleri men olardyń tálimgerleriniń qatysýymen baspasóz konferensıasy ótti, dep habarlaıdy almaty-akshamy.kz.
Esterińizge sala keteıik, 2023 jyldyń 21 jáne 22 qazanynda elordada «Green Belt WBC Kazakhstan» pılottyq jobasynyń fınaly ótti. Aqtyq jekpe-jektiń qorytyndysy boıynsha úsh almatylyq jas boksshy WBC chempıony belbeýin ıelenip, 1 mln teńge kólemindegi aqshalaı syılyqtyń ıegerleri atandy.
Baspasóz konferensıasynda sóz sóılegen Qazaqstan Kásipqoı boks federasıasynyń bas hatshysy Bolat Mankenov bul jarys dástúrli túrde AQSH, Argentına jáne Meksıka elderinde ótkiziletinin atap ótti.
«Jarysty uıymdastyrý joǵary deńgeıde ótti. Olarǵa Respýblıkanyń barlyq qalalary men oblystarynyń jas sportshylary qatysty. 20 óńirlik dıvızıon qurylyp, irikteý jarystary bastaldy. Grand-fınalda tórt aımaqtyń chempıondary, bes túrli salmaq dárejesinde jasyl belbeý úshin baq synasty», - dedi B.Mankenov.
Qazaqstan Kásipqoı boks federasıasynyń prezıdenti Vıktor Demánenkonyń aıtýynsha, bul týrnır tek kásipqoılar arasynda ǵana emes, sonymen qatar boks áýesqoılary arasynda da tanymal. Ol mundaı jarystardy ótkizý bokstyń damýyna jáne jańa chempıondardyń paıda bolýyna serpin beretinine senimdi.
«Týrnırge áýesqoı bokspen aınalysatyn balalar qatysty, biraq bul tıtýl olardyń odan ári damýyna jáne Qazaqstan quramasynyń kóshbasshylaryna umtylýyna kezekti yntalandyrý bolatynyna senimdimin. Biz buǵan úmittenemiz, sondyqtan mundaı jobany bizdiń balalarymyz ben kórermenderimiz úshin paıdaly dep sanaımyz», - dep bólisti ol.
Sportshylar týrnırge eki aı daıyndaldy. Kelesi jyly Chempıondar áıgili boksshy Saýl Alvarespen bir zalda «Kanelo» lagerinde jattyǵý ótkizýdi josparlap otyr.
ÓKQ alańyna jas boksshylar qatysyp,óz áńgimelerimen bólisti.
«Meni boksqa ákem alyp keldi. Ol buryn bokspen aınalysqan jáne meni ár ýaqytta ózimen birge jattyǵýǵa aparatyn. Sol kezde men osy sport túrimen aınalysamyn dep sheshtim. Kásibı bokstaǵy negizder men jańa tásilderdi kórip, bilý josparda bará, - dep atap ótti óz kezeginde boksshy, Green Belt WBC Kazakhstan belbeýiniń ıegeri Asanáli Sátpaev.
Green belt WBC Kazakhstan belbeýiniń taǵy bir ıegeri, boksshy Abaı Baıǵalyq boksqa óziniń kýmıri - ataqty qazaqstandyq boksshy Gennadıı Golovkınniń jetistiginen shabyt alyp kelgenin atap ótti.
«Bizdiń qazaqstandyq boksshynyń árbir jekpe-jegin kórip, onyń jeńisterine qyzyǵýshylyq tanytyp, men boksty tańdaımyn dep sheshtim. Sondaı - aq maǵan Jánibek Álimhanulynyń stıli men máneri unaıdy, sheteldik boksshylardan men Djaron Ennısti atap óter edim», - dedi ol.
Jýrnalıserdiń suraqtaryna jaýap bere otyryp, boksshy, Green Belt WBC Kazakhstan belbeýiniń ıegeri Zýlfat Iarmuhamedov týrnır kezindegi qıyn sátter týraly aıtyp berdi. Mysaly, eger jas boksshylar buryn úsh raýndta jekpe-jek ótkizse, bul jarys tórt raýnd boıy ótti.
«Biz árqashan úsh raýnd judyryqtasatynbyz. Tórtinshi raýnd - bul basqa deńgeı jáne áldeqaıda aýyr, munda minez kórsetýden basqa joly joq», - deıdi ol.
Sondaı-aq, jas sportshylar jattyqtyrýshynyń rólin atap ótti. Oǵan da kóp nárse baılanysty. Biraq sportshynyń jeke motıvasıasynsyz jetistikke jetý qıyn, deıdi olar.
Federasıa chempıondardyń ózderinen basqa, jazǵy demalys kezinde «Kanelo» lagerindegi oqý-jattyǵý jıyndaryna týrnırdiń júldegerleri de qatysatynyn atap ótti.