Almatynyń ındýstrıaldy aımaǵynda Almaty Autoparts Production jańa zaýytynyń ashylý saltanaty ótti.
Kásiporyn avtomobıl oryndyqtaryn shyǵarýǵa mamandanǵan. İs-sharaǵa Almaty qalasy ákiminiń orynbasary Álisher Ábdiqadyrov, QR Indýstrıa jáne qurylys mınıstrligi Indýstrıa komıtetiniń tóraǵasy Azamat Panbaev, Yongsan kompanıasynyń tóraǵasy Pak Chon Bom jáne «Astana Motors» kompanıasynyń negizin qalaýshy Nurlan Smaǵulov qatysty, dep habarlaıdy aqshamnews.kz.
Almaty Autoparts Production zaýyty jylyna 100 000 jıyntyq avtomobıl oryndyqtaryn (Hyundai, Great Wall Motors, Chery brendteri úshin) óndirýge qaýqarly. Bul avtokomponentter ımportyna táýeldilikti aıtarlyqtaı tómendetýge múmkindik beredi. Kásiporyn mýltımedıalyq júıeler, avtomobıl oryndyqtary jáne basqa da avtokomponentter óndirisin biriktiretin tehnoparktiń mańyzdy bóligine aınalady.
Zaýyttyń jalpy aýmaǵy 4 850 m², ınvestısıa kólemi – 4 mlrd teńge. Birinshi kezeńde 65 jańa jumys orny quryldy. Qurylys 2023 jyldyń úshinshi toqsanynda bastalyp, 2025 jyldyń naýryzynda jappaı óndiris iske qosyldy.
«Zaýyttyń ashylýy Almatynyń ónerkásiptik áleýetin damytýdaǵy mańyzdy qadam. Bul jańa jumys oryndary ǵana emes, sonymen qatar qala ekonomıkasyn damytýǵa, mamandardyń biliktiligin arttyrýǵa jáne joǵary tehnologıalyq óndiristi damytýǵa qosylǵan úles», – dedi Almaty ákiminiń orynbasary Álisher Ábdiqadyrov.
Kásiporynnyń basty maqsaty – avtomobıl klasterin damytý, avtokomponentter óndirisin jergiliktendirý jáne mashına jasaý salasynda bilikti mamandar daıarlaý.
Eske sala keteıik, 2024 jyly qazanda Almatynyń ındýstrıaldy aımaǵynda Ońtústik Koreıanyń Motrex korporasıasymen birlesip, jylyna 100 000 jıyntyq mýltımedıalyq qurylǵy shyǵaratyn zaýyt iske qosylǵan bolatyn.