Almaty qalasynyń elektr jelilerin damytý: 2030 jylǵa deıingi jospar
Almaty – elimizdiń eń iri qarjy-ekonomıkalyq jáne mádenı ortalyǵy, halyqtyń ómir súrý deńgeıin arttyrý boıynsha kóptegen mańyzdy mindetterdi oryndaıtyn megapolıs. Osy oraıda, qala energetıkalyq ınfraqurylymdy jańǵyrtýdy qajet etedi, óıtkeni elektrmen jabdyqtaýdyń senimdiligi men sapasyna qoıylatyn talaptar jyldan jylǵa artyp keledi.
Qazirgi ýaqytta Almaty qalasynyń energetıkalyq ınfraqurylymy kelesi kórsetkishtermen sıpattalady:
- Jalpy qýaty 2250 MVA bolatyn 220 kV kerneýli 5 qosalqy stansıa;
- Jalpy qýaty 3582 MVA bolatyn 110 kV kerneýli 49 qosalqy stansıa;
- Jalpy qýaty 405,7 MVA bolatyn 35 kV kerneýli 20 qosalqy stansıa;
- 8,6 myń shaqyrymnan asatyn elektr jelileri.
Elektr tutyný qýaty jyl saıyn artyp keledi. Eger qazir Almaty qalasynyń tutyný qýaty 982 MVt qurasa, 2030 jylǵa qaraı bul kórsetkish 468 MVt-qa artyp, 1450 MVt-qa jetedi. Al 2040 jylǵa qaraı tutyný qýaty 1700 MVt-qa deıin ósedi dep boljanýda.
Qalanyń energetıkalyq ınfraqurylymyn damytý úshin Almaty qalasynyń ákimdigi 2030 jylǵa deıin jáne 2040 jylǵa deıingi perspektıvalyq elektr jelilerin damytý josparyn ázirledi. Jospar aıasynda kelesi mindetter qoıylǵan:
- Jańa qosalqy stansıalardy salý;
- Qoldanystaǵy elektr jelilerin jańǵyrtý jáne qaıta qurý;
- Aýa jelilerin kabeldik jelilerge aýystyrý;
- Jańa tutynýshylardy qosý shekteýlerin joıý.
Bul is-sharalar tutynýshylardy sapaly elektr energıasymen qamtamasyz etýge, turǵyndardyń qaýipsizdigin arttyrýǵa jáne paıdalaný shyǵyndaryn azaıtýǵa múmkindik beredi. Sonymen qatar, áýe jelileriniń qorǵaý aımaqtarynda ornalasqan jer ýchaskelerin bosatý arqyly qalanyń aýmaǵyn tıimdi paıdalaný júzege asyrylady.
Elektr jelilerin damytý sqemasyn bekitý:
- Qajetti elektr energıasy kózderiniń jetkiliktiligin anyqtaýǵa múmkindik beredi.
- Elektr jelilerin jańadan paıda bolatyn jáne qýatyn arttyratyn tutynýshylarǵa beıimdeý úshin jumystar kólemin naqtylaýǵa jol ashady.
- Tehnıkalyq normatıvtik merzimi ótken jelilerdiń paıyzyn tómendetý úshin qaıta qurý jumystaryn josparlaýǵa múmkindik beredi.
- Qajetti kapıtal salymdarynyń kólemin jáne qarjylandyrý kózderin aıqyndaıdy.
Bul baǵdarlamany júzege asyrý Almaty qalasynyń energetıkalyq ınfraqurylymyn jańǵyrtyp, tutynýshylardyń suranysyn qanaǵattandyryp qana qoımaı, megapolıstiń turaqty damýyn qamtamasyz etedi.