Almatynyń ekologıa máseleleri erekshe baqylaýda
QR Prezıdenti janyndaǵy Ortalyq komýnıkasıalar qyzmetinde ótken baspasóz máslıhatynda qala ákimi Baqytjan Saǵyntaev jýrnalıserdiń suraqtaryna jaýap bere otyryp, megapolıstiń ekologıasyn saýyqtyrý sharalary týraly aıtty, dep habarlady Almaty-akshamy.kz.
Almatydaǵy ekologıalyq jaǵdaıdy jaqsartý maqsatynda qorshaǵan orta sapasynyń nysanaly kórsetkishterine qol jetkizý men 2025 jylǵa deıin Almaty qalasyndaǵy ekologıalyq jaǵdaıdy jaqsartý jónindegi is-sharalardyń keshendi jospary ázirlendi.
Qoǵamdyq kólikti otynnyń ekologıalyq taza túrine kóshirý boıynsha josparly jumystar júrgizilýde. Qoǵamdyq kólik júıesinde 2441 avtobýs bar. Sonyń ishinde 1715 avtobýs (75%) dızel otynymen júredi. Ákimdik dızel jáne benzın otynymen qoǵamdyq kólik satyp alýǵa tyıym salý týraly sheshim qabyldady. Barlyq qoldanystaǵy kelisimsharttar tek gazben júretin avtobýstardy jetkizýge baǵyttalǵan.
Barlyq qalalyq avtobýstardy gaz ben elektr energıasyna kóshirý jumystary bastaldy. 2020 jyly gaz otynymen 150 avtobýs satyp alyndy. 2021 jyly qalalyq qoǵamdyq kóliktiń 500-ge jýyq birligin gazben jáne elektr qýatymen satyp alý josparlanýda.
Sonymen qatar, bıyl qalaǵa kire beriste 19 ekologıalyq beket ornatý boıynsha jumystar júrgizilýde. Búginde 9 ekobeket ornatylǵan, qalǵan 10 beket bıylǵy jyldyń kúzine deıin kezeń-kezeńimen ornatylady.
Stasıonarlyq kózderden shyǵaryndylardy azaıtý boıynsha sharalar josparly túrde qabyldanýda. Máselen, 2-JEO boıynsha gazǵa aýystyrý máselesi sheshildi. 3-JEO boıynsha TEN ázirleýdi jobalaý uıymyn anyqtaý boıynsha konkýrstyq rásimder júrgizilýde. Al JEO-1 2017 jyly gazǵa kóshirildi.
Qala turǵyndaryn megapolıstiń túrli bólikterinde aýa sapasy týraly aqparattandyrý jobasy iske qosyldy. Qalanyń 49 LED-ekranyndaǵy 41 dachıkten, sondaı-aq "Almaty" telearnasynan kelip túsedi. Derekter kúnine úsh ret jańartylady.
Bıylǵy jyly aýa monıtorıńi boıynsha qosymsha 60 dachık ornatý josparlanýda. Barlyq derekter aqparatty jınaqtaýǵa, taldaýǵa jáne óńdeýge arnalǵan GAJ júıesine shyǵarylady. Osylaısha, qorshaǵan orta sapasynyń jaǵdaıyn boljaý úshin málimetter bazasy qurylady.