Almatyda kanıkýl kezinde oqýshylar demalý úshin kelgen qala mańyndaǵy lagerlerde jazǵy demalysty uıymdastyrý boıynsha baspasóz týry ótti. Oǵan QR Oqý-aǵartý mınıstrligine qarasty Balalardyń quqyqtaryn qorǵaý komıtetiniń tóraǵasy Nasymjan Ospanova, Almaty qalasy bilim basqarmasynyń basshysy Lázzat Jylqybaeva, ata-analar men qoǵam qaıratkerleri qatysty. Monıtorıń barysynda qatysýshylar Jellyfish (Qonaev q.) jáne «Órnek» qala syrtyndaǵy lagerlerdiń baǵdarlamasymen tanysty.
Eń áýeli olar 1700-den astam oqýshyǵa qyzmet kórsetýdi josparlap otyrǵan Qonaevtaǵy Jellyfish («Samruk company» JSHS) lagerine at basyn tiredi. Qala mańyndaǵy lagerdiń baǵdarlamasy san túrli, tálimgerler balalardy baseınde júzýge, keshki alaýdyń janynda gıtaramen án shyrqaýǵa úıretedi, balalar úshin belsendi demalys, shyǵarmashylyq baıqaýlar men jarystar uıymdastyrylady.
«Biz lagerde bolýǵa tıis barlyq tehnıkalyq shartty saqtaımyz. Demalýshylardyń qaýipsizdigi úshin perımetr boıynsha beınekameralar ornalasqan, órt dabyly bar. Jyl saıyn normatıvterge sáıkestigin tekseremiz. Bizde arnaıy daıyndyqtan ótken kásibı pedagogtar, tálimgerler jumys isteıdi. Lagerde 6 jastan 15 jasqa deıingi balalar tegin demalady. Ata-analar úshin demalysty Úkimet memlekettik satyp alý arqyly tóleıdi», - dedi Jellyfish lageriniń dırektory Janar Qýatbekova.
Budan keıin baspasóz týryna qatysýshylar Almaty qalasy Oqýshylar saraıynyń «Órnek» qala syrtyndaǵy lagerine aıaldady. Munda maýsym aıynda «Jas ulan» respýblıkalyq balalar-jasóspirimder uıymy qalalyq fılıalynyń úzdik ókilderi sletine eki aýysymy ótip, qaladaǵy 8 aýdannan 160 adam qatysty. 20-30 maýsym aralyǵynda lagerde «Januıa» áleýmettik kesheninen 80 bala demaldy. 4-13 shilde aralyǵynda ǵylymı-tehnıkalyq baǵyttyń beıindi aýysymynda lagerde áleýmettik sanatqa jatatyn otbasylardan shyqqan oqýshylar saraıynyń 92 oqýshysy, sonymen qatar, túrli baıqaýlardyń, jarystar men olımpıadalardyń jeńimpazdary demaldy. 18-27 shilde aralyǵynda kelesi aýysym ótedi. Oqýshylar saraıynyń bilim alýshylary úshin tamyz aıynda taǵy eki aýysym uıymdastyrý kózdelgen.
Aıda Býkaeva – kópbalaly ana, qazir eki uly «Órnek» lagerinde demalyp jatyr. Aıtýynsha, lagerde qaýipsizdik normasy eskerilgen, balalardyń tolyqqandy damýy úshin barlyq jaǵdaı jasalǵan.
«Bul bizdiń balalyq shaǵymyzdyń naǵyz lageri - barlyq qolaıly jaǵdaı jasalǵan, balalar dán rıza. Meni árkez balalar mekemesinde eń birinshi qyzyqtyratyn nárse – medısınalyq-sanıtarlyq bólim. Bul jerde ol tıisti normaǵa saı. Sodan keıin asqanasyna bardym, bári de talapqa saı. Barlyq ata-anaǵa dúrbeleńniń qajeti joq dep aıtqym keledi. Naǵyz baǵany balalar beredi. Búgin ulym eger múmkindik bolsa, ol ekinshi maýsymǵa qalatynyn aıtty. 10 jyl boıy balalary lagerge barǵan ana retinde ár joly balalar belgili bir jetistikpen oralatynyn aıtqym keledi. Iá, bul az ǵana merzim, biraq balalar ashylyp, táýelsiz bolýdy úırenedi, balalar alystaǵy ata-analaryn kóbirek túsine bastaıdy», - deıdi Aıda Býkaeva.
Jazdyń birinshi aıynda oqýshylardy mektep janyndaǵy lagerlerdiń tálimgerleri qarsy alyp, olarǵa túrli is-sharalar daıyndady. Baǵdarlamaǵa eksklúzıvti ekskýrsıalar men shyǵarmashylyq sheberhanalar kirdi. Balalar barlyq otrádaralyq baıqaýlarǵa, jarystar men konsertterge qatysty. Sonymen qatar, balalar úshin 30 myń balany qamtı otyryp, tegin tamaqtaný uıymdastyryldy. Jaz aıyn qalada ótkizetin balalar memlekettik jáne jeke qosymsha bilim berý uıymdarynda úıirmeler men seksıalarǵa belsendi qatysady.
Nasymjan Ospanova balalarǵa qyzmet kórsetetin uıymdardy retteý máselesi boıynsha normatıvtik-quqyqtyq bazadaǵy ózgerister týraly aıtty. Atap aıtqanda, osy qyzmet túri boıynsha bızneske moratorııdiń kúshin joıý, atalǵan salada jańa kásipkerlik sýbektilerin ashýdyń habarlamalyq tártibin baıandady.
Qalalyq bilim basqarmasynyń basshysy Lázzat Jylqybaevanyń aıtýynsha, qazir qalada 214 memlekettik mektep bar, olarda 300 myńnan astam bala oqıdy. Jyl saıyn Almaty qalasynyń ákimdigi kópbalaly jáne az qamtylǵan otbasylardan shyqqan 3000 balanyń saýyqtyrý demalysyna qosymsha qarajat bóledi, onyń ishinde ata-anasynyń qamqorlyǵynsyz qalǵan 100 balany jáne erekshe bilim berý qajettiligi bar balalardy qala syrtyndaǵy lagerlerge demalýǵa jiberý josparlanǵan.
«Búgin biz Almaty qalasy Oqýshylar saraıynyń «Órnek» memlekettik lagerinde turmyz. Ókinishke qaraı, lagerdiń jobalyq qýaty barlyq balany qamtı almaıdy, osyǵan baılanysty bilim basqarmasy saýyqtyrý demalysyna qosymsha baıqaý jarıalady. Baıqaý qorytyndysy boıynsha Almaly jáne Naýryzbaı aýdanynda Jellyfish balalar saýyqtyrý lageri («Samruk company» JSHS) jeńimpaz atandy. Ekinshi kompanıa Uzynaǵash aýylyndaǵy «Bel Rıchı» JSHS («Arman dala» lageri), biz qazir shartty buzýǵa májbúrmiz. Bul jerde mámile 107 mln teńgege jasalǵanyn atap ótkim keledi, biraq bizdiń tarapymyzdan óreskel zań buzýshylyqtarǵa baılanysty kompanıaǵa qarajat tólenbegen. «Taý samal» lagerin usynǵan «Aısulý» JSHS kompanıasynda da kemshilikter de anyqtaldy. Olarmen de kelisim buzylady. Qyzmet aqysy tólenbedi», - dedi Almaty qalasy bilim basqarmasynyń basshysy Lázzat Jylqybaeva.
Esterińizge sala keteıik, Almatyda demalys kezinde kópbalaly jáne az qamtylǵan otbasylardan shyqqan 3000-ǵa jýyq balany, onyń ishinde ata-anasynyń qamqorlyǵynsyz qalǵan 100 balany jáne erekshe bilim berý qajettiligi bar balalardy qala syrtyndaǵy lagerlerge demalýǵa jiberý josparlanǵan. Buǵan deıin «Bel Rıchı» JSHS («Arman dala»), «Aısulý jáne T» JSHS («Taý samaly») lagerleriniń bazasyndaǵy jaǵdaıdyń tıisti talapqa saı kelmeýine baılanysty Almaty qalasy bilim basqarmasy qyzmet kórsetý shartyn buzý týraly habarlama joldaǵan bolatyn. Aqysy tólenbedi. Bilim basqarmasynyń jaýapty qyzmetkerine qatań sógis jarıalandy.
