Bir jyl boıy ókpesindegi qaterli isikti emdeı almaı júrgen 3 balanyń anasyna shetelde emdelýden basqa amal joq.
Dárigerler konsılıýmy oǵan CAR-T terapıa alý kerek degen sheshimge kelipti, al bul em-dom Qazaqstanda jasalmaıdy, dep habarlaıdy Almaty-akshamy.kz
38 jastaǵy Zarına Álıeva ıyǵy aýyryp, 2 aı boıy jóteli qoımaǵan soń rengtgenge túsken. Dáriger nátıjesin kórip, kompúterlik tomografıadan ótýge keńes bergen. Onyń ókpesinen 11 santımetrlik isik anyqtalǵan. Jaǵymsyz jańalyqty estip, bir jyl boıy em izdegen. Al Astanadaǵy Ulttyq onkologıalyq ǵylymı ortalyǵynan 2 ret hımıa terapıa qabyldaǵan. Alaıda odan paıda bolmaı, qaterli isigi 2 ese ósip ketipti.
«Aýrý asqynyp keledi. Osy ortalyqtyń dárigerleri qoldan kelgenin jasady. Emdedi. Hımıaterapıa aldym. Alaıda, mendegi isik asqynyp barady. Onkologıalyq ortalyqtyń dárigerleri basqadaı em alý keregin aıtty. Onyń baǵasy óte qymbat bolyp tur», – dedi Almaty qalasynyń turǵyny Zarına Álıeva.
Ulttyq onkologıalyq ortalyqtyń dárigerleri naýqasty emdeý joldaryn anyqtaý úshin konsılıým ótkizgen. Nátıjesinde CAR-T terapıa alý kerek degen sheshimge kelipti. Al ondaı em-dom Qazaqstanda jasalmaıdy.
«Ózimiz salǵan úıimizdi satýǵa qoıdyq. Bizge tez arada qarajat jınaý kerek. Sondyqtan barsha qazaqstandyqtardan ótinip suraımyn, múmkindiginshe qol ushyn sozsańyzdar. Biz qazir áleýmettik jelide de paraqsha ashyp qoıdyq. Sonymen qatar, elde bizge kómektese alatyn qandaı qor bar, barlyǵyna ótinim beremiz», – dedi Zarınanyń joldasy Azız Moldybekov.
Azız Moldybekov «Qazaqstan halqyna» qoryna da júginbekshi. Atalǵan qor ókilderiniń aıtýynsha, balalar men 35 jasqa deıingi onkologıalyq jáne onkogemotologıalyq dıagnozy bar pasıentterge kómek kórsetedi. Al Zarına Álıevanyń jaǵdaıynda naýqas Mindetti áleýmettik medısınalyq saqtandyrý qoryna ótinish berýi kerek. Osy arqyly onyń shetelde em alýyna múmkindik bar eken.
«Bizde medısınalyq saqtandyrý qorynyń janynan jumys organy bar. Elimizdegi qazaqstandyq pasıentterdi shetelge emdeýge jiberetin jumys organy bolyp tabylady. Sondyqtan azamatsha óziniń dıagnozy boıynsha osy organǵa júginse bolady. Bul óz kezeginde sol sıaqty pasıentterdi memleket aıasynda tegin túrde sheteldik emdeýge jiberýge múmkindik bar», – dedi «Qazaqstan halqyna» qorynyń resmı ókili Dıas Beısenbek.
Zarına Álıevanyń aýrýdan aıyǵyp ketýine shamamen 500 myń dollar qarajat qajet. Sebebi Izraıldegi bir ǵana CAR-T terapıa 300 myń dollarǵa deıin barýy múmkin. Eger naýqas jansaqtaý bólimine tússe, oǵan qosymsha tóleıtin qarajat daıyn bolýy kerek eken. Qajet somany jınaýǵa shamamen 1 aı ýaqyt bar.