Búgin Ortalyq komýnıkasıalar qyzmetinde Almaty ákimi Erbolat Dosaevtyń qatysýymen brıfıń ótti. Brıfıń barysynda BAQ ókilderi bıyl satyp alynǵan jańa 1150 avtobýs pen 100 troleıbýs týraly suraq qoıyp, olardyń barlyǵynyń jetkizilgenin naqtylady.
Qala basshysy bul aqparatty rastady: "Barlyǵy 1150 avtobýs jetkizildi, negizgi bóligi - jeltoqsan aıynyń basynda. Qazir qabyldaý qarqyndy júrip jatyr, onyń ishinde 600 avtobýs jergilikti búdjet qarajaty esebinen satyp alynyp, 60 mlrd teńge jumsaldy.
Al 550 avtobýs - jeke tasymaldaýshylar esebinen. Eger Almatyda jolaýshylar tasymaly týraly aıtatyn bolsaq, onda bizde 24 tasymaldaýshy, bir mýnısıpaldy "Almatyelektrotrans", qalǵan 23 jeke tasymaldaýshy bar. Ózim jarıalaǵan josparlarmen - kelesi jyly biz 1100-den astam jańa avtobýstardy birge satyp alamyz dep úmittenemin.
Bul rette jeke tasymaldaýshylar qoǵamdyq kólikti ekologıalandyrý aıasynda dızeldi avtobýstardy satyp ala almaıdy". Qala basshysy 32 baǵyt týraly aqparatqa da túsinikteme berdi.
"Qazir marshrýtta 15 avtobýs tur, al jeltoqsan aıynyń sońyna deıin 25 avtobýs bolady. Aralyqty 7-8 mınýtqa deıin qysqartamyz. Qalada biz 22 jańa baǵytty iske qostyq. Alǵashqy 100 troleıbýsty da aldyq, onyń 55-i jelide, 45-i osy jyldyń sońyna deıin shyǵady. Kelesi jyly biz troleıbýs parkin tolyǵymen aýystyramyz. Esepteýler boıynsha jolaýshylar kóliginiń tıimdi jumys isteýi jáne aralyqtardy qysqartý úshin qalaǵa qosymsha 800-1000 avtobýs satyp alý qajet. Bıyl biz 1,5 mln adamdy tasymaldadyq, onyń kólemin ulǵaıtýdy josparlap otyrmyz. Qoǵamdyq kólik orta merzimdi perspektıvada Almaty qalasynyń kólik qurylymyna aınalýy tıis dep sanaımyn", - dedi ákim.