2025 jyldyń sońyna deıin Almatydaǵy áleýmettik nysandardyń 30%-y múmkindigi shekteýli azamattarǵa beıimdeledi
Bul týraly OKQ brıfıńinde Almaty ákimi Erbolat Dosaev málimdedi. Qazirgi ýaqytta qalada alǵash ret qalalyq ınfraqurylym obektilerine pasporttaý júrgizilýde. 2023 jyly 7,5 myń nysan qamtyldy. Áleýmettik ınfraqurylymdy beıimdeýdi, atap aıtqanda, emhanalar, aýrýhana, HQKO-larda pandýstar, qosalqy tutqalar, taktıldi plıtalar ornatýdy 2025 jyldyń sońyna deıin júrgizý josparlanýda.
"2030 jylǵa deıin teatrlar, murajaı, kitaphana men basqa da mádenıet nysandarynda pasporttaý júrgiziledi. Osylaısha 2030 jylǵa qaraı qalalyq nysandardyń 75%-y beıimdeledi. Jeke uıymdar da barlyq qala turǵyndaryn teń jaǵdaıda sezinip, kez kelgen ıgilikke qol jetkize alatyndaı bolady dep úmittenemin", – dep atap ótti Erbolat Dosaev.
Aıta keteıik, Almatyda ınvataksı jumysyn jalǵastyrýda. Onyń qyzmetin 2 myńǵa jýyq adam paıdalanady. 2023 jyly mamandandyrylǵan avtokólikterdiń sany 64-ten 100 birlikke deıin ulǵaıtyldy. Budan ózge múmkindigi shekteýli jandardy áleýmettik qoldaý boıynsha qarjylandyrý kólemi jyl saıyn artyp keledi. Ótken jylmen salystyrǵanda búdjet 40%-ǵa ósti.