QR Parlamentiniń Májilisi jáne Almaty qalasynyń máslıhat depýtattaryn saılaý boıynsha jalpyqalalyq baspasóz ortalyǵynyń alańynda qalanyń Aýmaqtyq saılaý komısıasynyń baspasóz konferensıasy ótti. Spıkerler megapolıste daýys berýdiń bastalǵanyn aıtty, dep habarlaıdy Almaty-akshamy.kz.
Almaty qalasynyń Aýmaqtyq saılaý komısıasynyń tóraıymy Aıgúl Qalyqova Almatyda barlyǵy 603 daýys berý ýchaskesi bar ekenin aıtty, búgin olardyń 602-i jumys istep tur. Saılaý ýchaskeleriniń bireýi ol jerde daýys berýshiler bolmaǵannan keıin, jumysyn toqtatty – bul QR UQK Shekara qyzmetiniń áskerı bólimi.
«Bizdegi aqparat boıynsha, barlyq saılaý ýchaskeleri jumystaryna kiristi, onyń ishinde, 7 ýchaskede daýys berý saǵat altydan bastaldy, qalǵandary jumystaryn saǵat 7-den bastady», - dep atap ótti Almaty ASK tóraıymy.
Kandıdattardyń senimdi ókilderiniń keıbir daýys berý ýchaskelerine telefonmen kirý máselesine kelsek, A.Qalyqova kelesideı túsinikteme berdi: «Bizde azamattardyń ýaqytsha turýyna arnalǵan birneshe ýchaskeler bar, olar áskerı bólimder, sanatorııler jáne t.b. Ol jerlerdiń óz erejeleri bar, oǵan sáıkes, telefonmen kirýge ruqsat bermeıdi, sol sebepti, baıqaýshylar men senim bildirilgen tulǵalardan saılaý ýchaskelerine barǵanda telefondaryn qaldyrý suraldy».
Almaty ASK tóraıymy tirkeýden shyǵarý kýálikteri arqyly daýys berýge qatysty mańyzdy jaıtty eske saldy.
«Almaty qalasynda esepten shyǵarý kýálikteri boıynsha daýys berý saılaýdyń tek bir túri boıynsha ǵana múmkin – QR Parlamentiniń Májilisine partıalyq tizimder boıynsha. Basqa saılaýlar boıynsha «Saılaý týraly» Konstıtýsıalyq zańǵa jáne esepten shyǵarý kýálikterin berý qaǵıdalaryna sáıkes, daýys berýge jol berilmeıdi», - dedi A.Qalyqova.
Ol sonymen qatar, jalpy, jumystyń shtattyq rejımde ótip jatqanyn atap ótti.