Osy aptada qalamyzda bolǵan mańyzdy jańalyqtarǵa sholý.
«...Mal qalǵansha, tal qalsyn»
Almaty turǵyndary kópqabatty úılerdiń aýlasyn jáne qoǵamdyq keńistikterdi kógaldandyrý úshin kóshetterdi tegin ala alady. 2025 jyldyń kóktemgi kezeńinde 228 ótinim maquldanyp, shamamen 2 myń japyraqty aǵash kósheti tegin taratylady.
Kóshetter 2025 jyly 19-20 sáýirde ár aýdannyń komúnıtı ortalyqtarynda taratylady. Ár komúnıtı ortalyqta 100 danaǵa deıin kóshet beriledi. Aksıaǵa qatysýshylar keıinnen kóshetterdi otyrǵyzǵany jóninde fotoesep tapsyrýy tıis.
5 499 tas
40 jastaǵy naýqastyń ót qabynan osynsha tas alynǵan. Bul – otandyq medısına tarıhynda tirkelgen eń sırek jaǵdaılardyń biri. Almaty qalalyq qoǵamdyq densaýlyq saqtaý basqarmasynyń málimetinshe, naýqas ortalyq qalalyq klınıkalyq aýrýhanaǵa jedel kórsetkishter boıynsha jetkizilgen. Onyń negizgi shaǵymdary – oń jaq qabyrǵa astyndaǵy aýyrsyný, álsizdik, júrek aınýy men jalpy mazasyzdyq bolǵan. Últradybystyq zertteý barysynda ót qabynda óte kóp kólemde konkrementter (tastar) anyqtalyp, dárigerler laparoskopıalyq holesıstektomıa (ót qabyn alyp tastaý) jasaýǵa sheshim qabyldaǵan.
– Biz kóp tas bolatynyn boljadyq, biraq 5 500-ge jýyq bolady dep eshkim oılaǵan joq. 20 jyldyq tájirıbemde mundaı jaǵdaımen alǵash ret kezdestim, – dedi hırýrgıa jónindegi bas dárigerdiń orynbasary Farabı Stamqulov.
Polısıa qyzmetkerine shabýyl jasaǵandar sottaldy
Aıyptalýshylar polısıa qyzmetkerine pyshaq jaraqatyn da salǵan. Tergeý qorytyndysy boıynsha eki qatysýshy da ustalyp, Qazaqstan Respýblıkasy Qylmystyq kodeksiniń 293-baby 3-bóligimen (buzaqylyq) jáne 380-baby 3-bóligimen (bılik ókiline qatysty kúsh qoldaný) qylmystyq jaýaptylyqqa tartyldy. Sot kúzetshini 5 jylǵa, ekinshi qatysýshyny 1 jyl 6 aıǵa sottady.
Ananyń aq súti
Endi bankte saqtalady. Almatyda jańa týǵan nárestelerge arnalǵan emshek súti banki ashyldy.
Emshek sútin saýý meıirgerdiń baqylaýymen mindetti tańbalanýy bar sterıldi jeke ydystarda (saýý kúni men ýaqyty) júzege asyrylady. Jeke jáne klınıkalyq emshek sorǵylaryn paıdalanýǵa ruqsat etiledi. Barlyq is-sharalar sanıtarıalyq-gıgıenalyq normalardy saqtaı otyryp júrgiziledi. Bank sterıldi ydystarǵa jınalǵan jáne emshek sútimen qorektendirý múmkin bolmaǵan kezde balany tamaqtandyrý úshin tómen temperatýrada saqtalatyn saýylǵan sút qory bolyp tabylady. Munda salqyndatylǵan (4 ± 2 °C temperatýrada saqtalǵan) jáne muzdatylǵan (-18...-20 °C temperatýrada) saýylǵan tabıǵı (shıki) sútti saqtaýǵa bolady.
Jasyl jelek jaıqalsyn desek
20 sáýirden bastap Almatyda jasyl jelekterdi bıologıalyq óńdeý maýsymy bastalady. İs-sharalar aǵashtardyń jaǵdaıyn jaqsartý, olardyń zıankesterge tózimdiligin arttyrý jáne qalada ekologıalyq tepe-teńdikti saqtaý maqsatynda ótkiziledi. Jumys túnde júzege asyrylady: tikeleı kún sáýlesiniń bolmaýy baıaý býlaný arqyly zıankesterge qarsy quraldardyń uzaq áser etýine yqpal etedi.
Óńdeý jumystary tórt kezeńde oryndalady:
• I kezeń: 20 sáýirden 30 mamyrǵa deıin-birinshi óńdeý (tórt ret emen jáne eki ret terek óńdeýdi qosqanda);
• II kezeń: 1 maýsymnan 30 maýsymǵa deıin-ekinshi óńdeý;
• III kezeń: 5 shildeden 5 tamyzǵa deıin-úshinshi óńdeý;
• IV kezeń: 15 tamyzdan 20 qyrkúıekke deıin-tórtinshi óńdeý.
Marafon kúni qoǵamdyq kólik qozǵalysy ózgeredi
20 sáýir kúni Almatyda jartylaı marafon qashyqtyǵy ótetin jol ýchaskelerinde kólik qozǵalysy ishinara shekteledi. Osyǵan baılanysty Qalalyq mobıldilik basqarmasy qoǵamdyq kólik baǵyttaryna ýaqytsha ózgerister engiziletinin habarlaıdy. Ár baǵyt boıynsha ýaqytsha qozǵalys syzbasymen @AlmatyJoly Telegram-arnasynda kelesi silteme arqyly tanysýǵa bolady: https://t.me/AlmatyJoly/1593
Almaty marafonyna 10 myń adam qatysady
Qalada ótetin segizinshi jartylaı marafon aıasynda dástúrli qashyqtyq qamtylady: 21,1 km (jartylaı marafon), 10 km, 10 km (skandınavıalyq júris) jáne komandalyq estafeta. 20 sáýir kúni saǵat 07:00-den 11:00-ge deıin marafon baǵyty ótetin jol ýchaskelerinde kólik qozǵalysy ishinara shekteledi. Jarys tańǵy 07:00-de Tuńǵysh Prezıdent saıabaǵynan bastalady.
Zańsyz saýda nysandarymen kúres kúsheıtiledi
Almatyda 1 mamyrǵa deıin sozylatyn zańsyz ornatylǵan saýda nysandaryn bólshekteý boıynsha aýqymdy aksıa bastaldy. Naýqan Almaty ákimi Erbolat Dosaevtyń tapsyrmasy boıynsha «Taza Qazaqstan» jalpy respýblıkalyq baǵdarlamasy jáne «Almaty – bizdiń ortaq úıimiz» qalalyq bastamasy aıasynda júzege asyrylýda.
Almatyda jańa Dostyq úıi salynady
Bıyl Qazaqstan halqy Assambleıasynyń qurylǵanyna 30 jyl tolyp otyr — bul qoǵamdyq ınstıtýt Memleket basshysynyń Jarlyǵymen qurylǵan. Dál osy Almatyda Assambleıany qurý týraly sheshim qabyldanyp, qazaqstandyq ultaralyq kelisim úlgisiniń negizgi qaǵıdattary qalyptastyryldy. Budan keıingi damýdyń mańyzdy baǵyty – etnomádenı birlestikterge arnalǵan zamanaýı ınfraqurylymdy qalyptastyrý bolmaq. Osy rette Almaty qalasynyń ákimi Erbolat Dosaev shaharda jańa Dostyq úıin salý jospary bar ekenin málimdedi.
Jolaqyny QR arqyly tóleýge bolady
Almaty metropolıteninde qalalyq qoǵamdyq kólik qyzmetiniń sapasyn arttyrý maqsatynda 16 sáýirden bastap pılottyq rejımde jolaqy tóleýdiń jańa tásili engiziledi. Bul balamaly tólem tásili jolaýshylarǵa ınternet jelisine qosylmaı-aq QR-kod arqyly jolaqy tóleýge múmkindik beredi.
Jańa tásil boıynsha jolaqyny tóleý úshin:
1. ONAY! qoldanbasyn telefonda ashyńyz.
2. Negizgi bettiń tómengi jaǵynda QR túımenibasyńyz.
3. «QR kodty jasaý» tańdańyz-ol baılanys bolmaǵan kezde de jasalady.
4. QR kodty týrnıkettegi kameraǵa kórsetińiz.
5. Júıe balansty tekseredi, týrnıket ashylady.
Aspanda aıaldap qalǵan
Atraksıonnyń toqtaýyna qaýipsizdik dachıginiń iske qosylýy sebep bolǵan. Almaty qalalyq Polısıa departamenti saıabaqtardyń birinde demalýshylar mingen átkenshektiń kenetten toqtap qalýyna baılanysty tergeýdi bastady. Karýseldegi barlyq adam segiz mınýt ishinde aman-esen tómenge túsirildi. Oqıǵadan eshkim zardap shekken joq.
Chempıondy quttyqtaý
Almaty ákimdigi mánerlep syrǵanaýshy Mıhaıl Shaıdorovty álem chempıonatynda kúmis medal jeńip alýymen quttyqtady. Kezdesý barysynda Beıbit Shahanov Almaty ákimdiginiń atynan Mıhaıl Shaıdorovqa 2,5 mıllıon teńge kóleminde qarjylaı sertıfıkat tabystap, onyń otandyq sportty damytýǵa jáne qalany halyqaralyq deńgeıde tanytýǵa qosqan zor úlesin erekshe aıtty.