Osy aptada qalamyzda bolǵan mańyzdy jańalyqtarǵa sholý.
Jármeńkege kelýshi kóbeıdi
Almatyda demalys kúnderi ótetin jármeńkelerge apta saıyn kelýshiler sany 45 000 adamǵa deıin ósti. Demalys kúnderi azyq-túlik taýarlaryn satatyn jármeńkelerge qatysatyn almatylyqtar men qala qonaqtarynyń sany aptasyna 45 000 adamǵa jetti. Apta saıyn jármeńkege qatysýshylar jalpy kólemi 1000-nan astam ataýlardan turan 800 tonnaǵa jýyq azyq-túlik taýarlaryn et, jumyrtqa, kókónister, jemister, ashytylǵan sút ónimderi, shujyqtar, bal jáne basqa da ónimderdi satady. Jármeńkelerdi «Almaty» ÁKK» AQ uıymdastyrady. Baǵany turaqtandyrý tetikterin iske asyrý sheńberinde áleýmettik mańyzy bar azyq-túlik taýarlary jármeńkelerde naryqtyq baǵadan 15-20% tómen baǵamen satylady.
Almatylyqtarǵa jeńildetilgen nesıe beriledi
«Almaty» MQU-da bir qaryz alýshyǵa qarjylandyrýdyń eń joǵary somasy 78 640 000 teńgeni quraıdy. Qaryz merzimi - 7 jylǵa deıin. Baǵdarlamaǵa qatysýdyń negizgi sharty — Almaty qalasynyń aýmaǵynda bıznesti tirkeý jáne júrgizý. Óndiris jáne qaıta óńdeý, áleýmettik baǵdarlanǵan kásipkerlik (onyń ishinde bilim berý, sport jáne densaýlyq saqtaý salalaryndaǵy) salalaryndaǵy jobalar, sondaı-aq ımportty almastyrýǵa, eksportqa baǵdarlanýǵa, kreatıvti ındýstrıalarǵa jáne t. b. baǵyttalǵan bastamalar qaraýǵa basym bolyp tabylady. Jyldyq tıimdi syıaqy mólsherlemesi jeke-jeke esepteledi jáne 13% - dan aspaıdy. Jeńildetilgen nesıeleý baǵdarlamasy týraly tolyǵyraq +7 (727) 390 80 42 telefony nemese veb-saıt arqyly bile alasyz: https://mfoalmaty.kz
Almatyda 120 tósek-oryndyq jańa jataqhana ashyldy
Bul jataqhanada Qazaq Ulttyq Qyzdar pedagogıkalyq ýnıversıtetiniń stýdentteri turady. Jataqhana aýmaǵynda stýdentterdiń jaıly ómir súrýi úshin barlyq jaǵdaı qarastyrylǵan: jaryq ári keń bólmeler, as úı, oqý jáne demalys oryndary da bar. Sonymen qatar, konferens zal wi-fi jelisimen jabdyqtalǵan, bul bilim alýshylarǵa túrli is-sharalar uıymdastyrýǵa jáne onlaın bilim alýyna múmkindik beredi.
Almaty qalasynda 127 stýdenttik jataqhana jumys isteıdi. Bul jataqhanalarda 40,3 myńnan astam stýdent turyp jatyr.
Merzimi ótken dáriler qabyldanady
Qala boıynsha birqatar emhanalarda arnaıy qabyldaý jáshikteri ornatylǵan, onda turǵyndar jaramsyz dárilerdi tegin jáne qaýipsiz túrde ótkize alady. Bul joba 2023 jyly bastalyp, búginde Almatynyń birneshe aýdandaryn qamtyp otyr. Dárilerdi qabyldaıtyn mekemeler tizimi jergilikti ákimdikter men emhanalardyń resmı paraqshalarynda jarıalanǵan.
Qalada elektr energıasyn óndiretin zaýyt salynady
Almaty ákimi Erbolat Dosaev pen SUS Environment kompanıasynyń prezıdenti Long Szıshen qoqys óńdeý zaýytyn salý perspektıvalaryn talqylady. Shanghai SU Environment Co., Ltd. - ekologıa jáne energetıka salasyndaǵy keshendi qyzmetterdiń álemdik basty jetkizýshisi, qaldyqtardy energıaǵa qaıta óńdeý salasynda (Waste-to-Energy) Qytaıdaǵy naryq úlesiniń 40% - yn qamtıdy. Almatyda zaýyt salý jónindegi jobany iske asyrýdan basqa, SUS Environment kompanıasy kadrlar daıarlaý jónindegi óńirlik oqý ortalyǵyn qurý jóninde bastama kóterdi. Ortalyq ekologıalyq quzyretterdi damytýǵa jáne ozyq tehnologıalardy óńirge berýge járdemdese otyryp, Qazaqstannan, Ortalyq Azıa elderinen, Mońǵolıadan, Irannan jáne Aýǵanstannan jas mamandardy oqytýǵa baǵdarlanatyn bolady.
Alaıaqtar adam tańdamaıdy
Almatylyqtarǵa qajylyq pen ýmraǵa qatysty alaıaqtyq jaıly eskertý jasaldy, sebebi dinı týrlarǵa baılanysty alaıaqtyq jaǵdaılarynyń ósýi baıqalady. Bul týraly óńirlik komýnıkasıalar qyzmetiniń baspasóz konferensıasynda Qazaqstandyq týrısik qaýymdastyqtyń dırektory Rashıda Shaıkenova málimdedi, dep habarlaıdy aqshamnews.kz
Shaıkenova qajylyqty uıymdastyrý boıynsha qyzmetterdi Qazaqstan musylmandary dinı basqarmasynda akkredıttelgen kompanıalar ǵana kórsetýge quqyly ekenin atap ótti. «Búginde osyndaı 15 kompanıa bar, olardyń tizimi Qazaqstan musylmandary Dinı basqarmasynyń resmı saıtynda ornalastyrylǵan. Ýmra úshin seriktes tańdaǵanda bedelge, sharttardyń ashyqtyǵyna jáne zańdy jaýapkershilikke nazar aýdarý kerek», - dep qosty ol.
Qajetsiz kıimdi kádege jarat!
Almatylyqtar bir aıda 20 myńnan astam qajetsiz kıim tapsyrdy, shaharda toqyma qaldyqtaryn jınaý jáne óńdeý boıynsha jańa ekologıalyq aksıa bastaldy. Toqyma qaldyqtaryn jınaý, suryptaý jáne qaıta óńdeýge baǵyttalǵan FABRIKA jobasy bir aıdyń ishinde alǵashqy nátıje kórsetti. Búgingi tańda qalada 18 arnaýly konteıner ornatyldy, jaqynda taǵy 22 konteıner ornatý josparlanǵan. Ekologıalyq baǵalaýlar boıynsha qazirdiń ózinde jınalǵan kólemdi qaıta óńdeý 74 000 kılogramnan astam CO₂ ekvıvalentiniń aýaǵa taralýyn boldyrmaýǵa múmkindik beredi – bul mólsherdegi kómirqyshqyl gazyn bir jylda 3 730-dan astam aǵash sińire alar edi.
Súıer ulyń bolsa, súı!
Kórnekti qazaqstandyq mánerlep syrǵanaýshy, ulttyq quramanyń kóshbasshysy Mıhaıl Shaıdorov álem chempıonatyndaǵy tarıhı jetistiginen keıin týǵan eline oraldy. Almaty qalasynyń áýejaıynda 20 jastaǵy sportshyny saltanatty túrde qarsy aldy. Ony Almaty qalalyq sport basqarmasynyń ókilderi, jankúıerler men komandalastary qushaq jaıa kútip aldy. Bul — tek bir sportshynyń jeńisi emes, tutas qazaqstandyq mánerlep syrǵanaýdyń damýyndaǵy jańa kezeńniń bastaýy.
Mıhaıl Shaıdorov AQSH-tyń Boston qalasynda ótken mánerlep syrǵanaý boıynsha álem chempıonatynda kúmis medal jeńip alyp, el tarıhyndaǵy eń úzdik nátıjege qol jetkizdi. Ol erkin baǵdarlamada da, jalpy upaı sanynda da óziniń jeke rekordtaryn jańartty. Bul jetistik ony 2026 jyly Italıada ótetin Qysqy Olımpıada oıyndaryna qatysatyn basty úmitkerlerdiń birine aınaldyrdy.
Almatyda úı janýarlaryn tegin zararsyzdandyrý baǵdarlamasy bastaldy
Qańǵybas janýarlardyń sanyn retteý maqsatynda úı janýarlaryn tegin zararsyzdandyrý jáne pishtirý baǵdarlamasy 1 sáýirden jyl sońyna deıin jalǵasady. Baǵdarlamaǵa qatysýǵa derekter qorynda senimdi esepke alý úshin veterınarıalyq pasporty men mıkrochıpy bar janýarlar jiberiledi. Mıkrochıpy men pasporty bolmaǵan jaǵdaıda, olardy tómende atalǵan kez kelgen emhanadan qosymsha aqy tólep alýǵa bolady. Itter men mysyqtardy zararsyzdandyrýdyń jas shekteýi 7 aıdan 9 jasqa deıin, tóbet ıtter men er mysyqtardy zararsyzdandyrýdyń jas shekteýi 6 aıdan 9 jasqa deıin.
Mamyr aıynda «Selınnyı» ortalyǵy ashylady
Almaty mádenı astana mártebesin nyǵaıtýda. Ótken jyly jeke ınvestısıalar esebinen qalada jalpy sany 836 nómirdi quraıtyn 35 ornalastyrý orny ashyldy. Qosymsha tańda 5,6 myńnan astam nómirge arnalǵan 40 qonaqúı qurylys jobasy júzege asyrylýda, onyń ishinde 10 qonaqúıdi 2025 jyly ashý josparlanyp otyr. Almatyda týrısik qyzmetterdiń eksportyn arttyrý úshin iskerlik jáne is-sharalyq týrızm belsendi damýda. Búgingi tańda MICE jáne EVENT ınfraqurylymy boıynsha 27 joba iske asyrylýda.
«Qalamyzdaǵy mańyzdy nysandar Almaty Museum of Arts jáne “Selınnyı” zamanaýı mádenıet ortalyǵynyń 2025 jyldyń mamyr aıynda qurylysyn aıaqtaýy – Almatyny elimizdiń mádenı astanasy retinde aıqyndaıdy. Qalanyń negizgi ınfraqurylym nysandaryn jańǵyrtý jalǵasýda. Bıyl «Medeý» muz keshenin jáne «Ortalyq stadıondy» 35 myń kórermenge deıin ulǵaıta otyryp modernızasıalaı jumystary bastalady. Jumystardyń aıaqtalýy 2027 jylǵa josparlanǵan», - dep atap ótti Almaty qalasynyń ákimi Erbolat Dosaev.
Almatyǵa keldiń be sen?
Qala ákiminiń aıtýynsha, ótken jyly Almatynyń týrısik salasy qarqyndy ósim kórsetti. 2024 jyly týrıserdiń jalpy sany 14,8%-ǵa ósip, 2,3 mln týrısti qurady.
«Sheteldik týrıser sany 27%-ǵa artyp, 680 myńnan astam adamǵa jetti. İshki týrıser sany 10,4%-ǵa artyp, 1,6 mln adamnan asty. Nátıjesinde kórsetilgen týrısik qyzmetter kólemi 30%-ǵa ósip, 96,3 mlrd teńgeni qurady. Almatyǵa Úndistan, Qytaı, AQSH, Túrkıa, Ońtústik Koreıadan týrıser keledi», - dedi Erbolat Dosaev.
Almatyǵa alǵash ret Talgo poıyzymen júk ákelindi
Qazaqstanda jolaýshylar poıyzy arqyly komersıalyq júk tasymaldaýdyń jańa kezeńi bastaldy: Astanadan Almatyǵa Talgo poıyzy arqyly 1 tonna 700 keli júk sátti jetkizildi. Júk tasymaly "Qazaqstan temir joly" UK men Warehouse Management IAA logıstıkalyq kompanıasynyń birlesken seriktestigi arqyly júzege asty. Atalǵan kompanıa elimizdegi kıim-keshek dúkenderiniń 80%-dan astamyna qyzmet kórsetedi jáne LTL-jetkizý boıynsha jetekshi sanalady.