Almatynyń Almaly aýdanynda jyl sońyna deıin 47 myń sharshy metr jol tósemi jóndeledi
Almaly aýdanynyń turǵyndarymen kezdesý barysynda Almaty ákimi Erbolat Dosaev aýdandaǵy jol ınfraqurylymyn damytý jáne jolaýshylar tasymalynyń sapasyn arttyrý jumystaryna toqtaldy, dep habarlaıdy aqshamnews.kz
Megapolıs basshysy búgingi tańda aýdanda aǵymdaǵy jóndeý aıasynda 25 myń sharshy metr jol tósemi jóndelgenin, al bıylǵy jospar - 47 myń sharshy metr ekenin habarlady.
«Qazirdiń ózinde 2,3 km trotýar jabdyqtalyp, 2 km aryq jelisi salyndy, qazan aıynyń sońyna deıin taǵy 6,9 km aryq qamtylady. Sondaı-aq, ótken aıda 14 kóshede 12,5 km jolǵa ortasha jóndeý jumystary aıaqtaldy. Qyrkúıek aıynyń sońyna deıin Isaev kóshesinde uzyndyǵy 1,2 km jolǵa ortasha jóndeý jumystary aıaqtalady», - dedi Erbolat Dosaev.
Qoǵamdyq kólikte qyzmet kórsetý sapasyn arttyrýǵa toqtalǵan Almaty ákimi bıyl jyljymaly quram 101 avtobýsqa, 327-den 428 birlikke kóbeıip, 24 marshrýtta jańartylǵanyn aıtty.
Jalpy, Almatyda bıyl uzyndyǵy 250 km bolatyn 274 kóshe ortasha jóndeýden ótti. Osylaısha jaqsy jáne qanaǵattanarlyq jaǵdaıdaǵy joldyń úlesin 92%-ǵa deıin jetkizý josparlanyp otyr.
Buǵan qosa, jergilikti búdjet esebinen gazben júretin 600 avtobýs, 100 elektrli avtobýs jáne 112 troleıbýs satyp alynady. Jeke avtoparkter osy jyldyń birinshi jartyjyldyǵynda gazben júretin 150 avtobýs pen 15 elektrobýs satyp aldy. Qazirgi ýaqytta qalanyń troleıbýs parki tolyǵymen jańartyldy.