Almatyda sýǵa túsetin maýsymnyń aldynda sý qoımalaryndaǵy qaýipsizdik jaǵy kúsheıtildi
Sýǵa shomylatyn maýsym kezindegi qaýipsizdikti kúsheıtý maqsatynda Almatyda «Mamyr qaýpi» degen atpen keshendi is-sharalar jasalyp, bekitildi. Almatynyń óńirlik komýnıkasıalar qyzmetinde ótken pres-konferensıada osy týraly aıtyldy, dep habarlaıdy aqshamnews.kz
TJD aqparatyna qaraǵanda, Almatynyń aýmaǵy men taýǵa jaqyn jerlerde ornalasqan 44 sý qoımasynyń 9-y sýǵa túsýge qaýipti.
1. Shańyraq pen Darhan yqshamaýdanyndaǵy Úlken Almaty ózeni – Alataý aýdany;
2. Darhan yqshamaýdanyndaǵy Úlken Almaty ózeni – Alataý aýdany;
3. Ál-Farabı men Navoı jaqtaǵy Úlken Almaty ózeni - Bostandyq aýdany;
4. Kemel yqshamaýdanyndaǵy Pervomaıskıe prýdy – Jetisý aýdany;
5. Kishi Almaty ózeni (Býtakovkaǵa buryla bergende) – Medeý aýdany;
6. Iýnnatskoe ózeni – Medeý aýdany;
7. Qarasý yqshamaýdanyndaǵy toǵan - Alataý aýdany;
8. Aeroportovskoe ózeni – Túrksib aýdany;
9. Qarasý jaqtaǵy ózen (Shestýha) – Túrksib aýdany.
«Tórt jerde – Saıran kóliniń batys jáne shyǵys jaǵynda, «Gúlder» demalys orny men «Baým» baǵynyń aýmaǵyndaǵy jaǵajaıda ǵana sýǵa túsýge ruqsat. Biraq qazir bul sý qoımalary sýǵa tola qoımaǵan. Saıran kólinde byltyrdan beri jaǵalaýdy abattandyrý jumystary júrip jatyr. D. Qonaev atyndaǵy ÚAÓ-de gıdrotehnıkalyq qurylymdar kúrdeli jóndeýden ótip jatyr»,- dep habarlady, Almaty qalasy TJD Azamattyq qorǵanys basqarmasynyń bastyǵy Qýanysh Ospanov.
Sýdaǵy qaýipsizdikti kúsheıtý úshin, Departament qazir polısıa qyzmetkerleriniń, qutqarýshylar men eriktilerdiń basyn qosyp, reıd jasap jatyr. Byltyr sýǵa túsýdiń ádeb-erejesin óreskel buzǵan 40 adam ákimshilik jaýapqa tartyldy.
Sonymen birge, byltyrdan beri qaýipti sý qoımalaryna ıntellektýaldy kameralar qoıylyp, olardy TJD-nyń arnaýly kompúterleri men sýdaǵy qutqarý qyzmetiniń mamandary baqylap otyratyn boldy. Kameradaǵy beınelerdi TJD qyzmetkerleri smartfonnan da kórip otyrady.
«Biz osyǵan oraı turǵyndardy qulaqtandyryp, jumys istep jatyrmyz. Adam kóp júretin bilim berý, densaýlyq saqtaý mekemelerinde, joldyń boıynda turǵan LED ekrandardan beınerolık kórsetýdi de qolǵa aldyq,- dep tolyqtyrdy TJD ókili.
Oqys oqıǵa bolmas úshin, qutqarýshylar sýǵa túsken kezde asa saq bolýǵa shaqyrdy turǵyndardy.
- Sýdyń jaǵasynda balalardy qaraýsyz qaldyrmańyz;
- Júze almasańyz, sýǵa tereńdep boılamańyz;
- Sýǵa túskende bir-birińizden kóz jazyp qalmańyz;
- Arnaýly belgi qoıylǵan jerden alysqa uzamańyz;
- Kópirden, jaǵadan, qaıyqtan sýǵa sekirmeńiz;
- Túnde de sýǵa túspeńiz.