Búginde Almaty elimizdegi qaıyrymdylyq ortalyǵy bolyp tabylady. Munda jyl saıyn memlekettik organdar men mesenattar muqtaj jáne kóp balaly otbasylarǵa kómek kórsetedi. Almaty qalasy bilim basqarmasy basshysynyń orynbasary Qaırat Jumanov Óńirlik komýnıkasıalar qyzmetiniń brıfıńinde «Mektepke jol» aksıasynyń qorytyndylary týraly aıtty, dep habarlaıdy almaty-akshamy.kz
Aıta ketsek, jalpyrespýblıkalyq aksıa Memleket basshysynyń joldaýy aıasynda júzege asyrylýda. Onyń maqsaty áleýmettik jaǵynan qorǵalmaǵan jáne az qamtylǵan otbasylardyń balalaryna (onyń ishinde kóp balaly otbasylardyń) kómek kórsetý, áleýmettik sebepter boıynsha balalardyń mektepke kelmeýiniń aldyn alý.
«Epıdemıologıalyq jaǵdaıdyń saqtalýyna baılanysty «Mektepke jol» dástúrli aksıasyn ótkizý platforma arqyly jyl boıy jalǵasady. Kómekke muqtaj ata-analar www.atamekenim.kz saıtyna óz ótinishterin qaldyra alady. Al demeýshiler men mesenattar kómek kórsetý boıynsha ótinim bere alady», - dedi Qaırat Jumanov.
Sonymen qatar, kómek kórsetýdiń dástúrli ádisteri jalǵasýda. Qazirgi ýaqytta áleýmettik qorǵalmaǵan jáne az qamtylǵan otbasylardan shyqqan 22142 oqýshyǵa 774 mln 970 myń teńge búdjet qarajaty (jappaı oqytý qory) somasynda kómek kórsetildi.
Sonymen qatar, aksıany Almaty qalasynyń mesenattary qoldap, 9 022 oqýshyǵa 123 mln 399 myń teńge kóleminde demeýshilik kómek kórsetti.
Qaırta Jumanov bilim basqarmasy men jappaı oqytý qory tarapynan 1-11 synyp oqýshylary úshin tegin tamaqtaný uıymdastyrylǵanyn atap ótti. Bul maqsatqa jergilikti búdjetten qarajat qarastyrylǵan, 24 myńnan astam oqýshy qala mektepterinde tamaqpen qamtamasyz etilgen.