Almaty ákimdigi quramyna ABM-vuilding 2007, "Elektroremont" JSHS jáne "ABM-Project" JSHS kiretin jeke seriktes-konsorsıýmǵa qarsy ekinshi ınstansıadaǵy sotta jeńiske jetti, dep habarlaıdy almaty-akshamy.kz
Eske salsaq, ótken jyldan beri Almaty ákimdigi men josyqsyz jekeshe áriptes arasyndaǵy sot prosesteri jalǵasýda.
Buǵan deıin habarlanǵandaı, 2022 jyldyń qazan aıynda Almaty qalasynyń mamandandyrylǵan aýdanaralyq ekonomıkalyq sotynyń sheshimimen "Almaty Qala Jaryq" MKK úsh kompanıadan turatyn jeke áriptes – konsorsıýmmen: "ABM-Vuilding 2007" JSHS, "Elektroremont" JSHS jáne "ABM-Project"JSHS-men shartty buzý týraly talaby qanaǵattandyryldy.
- Qarasha aıynda jeke seriktes apelásıalyq shaǵym túsirdi. Qańtar aıynda uzaq ýaqytqa sozylǵan iske núkte qoıyldy. Almaty qalalyq sotynyń sot alqasynyń 2024 jylǵy 15 qańtardaǵy qaýlysymen jeke áriptestiń apelásıalyq shaǵymyn qanaǵattandyrýdan bas tartyldy. Almaty qalasynyń mamandandyrylǵan aýdanaralyq ekonomıkalyq sotynyń 2023 jylǵy 11 qazandaǵy MJÁ shartyn buzý týraly AQJ talaby boıynsha sheshimi ózgerissiz qaldy.
- Sot sheshiminiń qorytyndysy boıynsha energetıka jáne sýmen jabdyqtaý basqarmasynyń, "Almaty Qala Jaryq" MKK ókilderinen, jeke áriptesinen, MJÁ obektileriniń jaı-kúıin qaraý jáne olardy qala balansyna berý úshin tehnıkalyq aýdıt jáne baǵalaý jónindegi táýelsiz sarapshylardan komısıa qurylýǵa tıis.
Anyqtalǵan eskertýler boıynsha jeke seriktes aqaýlardy joıýǵa mindetti. Alaıda, sońǵysy memlekettik seriktestiń aýdıtke jáne syrtqy jaryqtandyrý obektilerin qala balansyna berýge arnalǵan barlyq hattaryn elemedi.
"Qalyptasqan jaǵdaıdy eskere otyryp, jaqyn arada quqyqtyq salada baǵalaý júrgizý jáne bar kemshilikterdi qujattaý úshin táýelsiz sarapshylardy tartý úshin konkýrs jarıalaý josparlanýda. Sonda "Almaty Qala Jaryq" MKK qalpyna keltirý jumystaryna tolyqtaı qosyla alady. Qazir biz jekeshe áriptes tarapynan qarsylyq kórip otyrmyz: konsorsıým aqaýlardy joıýdy jáne shyǵyndardy óteýdi qalamaıdy", - dep túsindirdi “Almaty Qala Jaryq" MKK.
Eske salsaq, Energetıka jáne sýmen jabdyqtaý basqarmasy, "Almaty Qala Jaryq" jáne ABM-Vuilding 2007 JSHS, "Elektroremont" JSHS jáne ABM-Project JSHS quramyndaǵy konsorsıým 2018 jyly "Almaty qalasynyń syrtqy jaryqtandyrýyn modernızasıalaý" jobasy boıynsha 27 mlrd somaǵa jýyq memlekettik-jekemenshik áriptestik shartyn jasasty, ol keıin jumys kóleminiń ósýine baılanysty 43,6 mlrd deıin ósti.
Shart boıynsha jeke seriktes 2019-2023 jyldar aralyǵynda 12,5 mlrd teńge ınvestısıalap, 44 myńnan astam jaryq núktelerin modernızasıalaýy tıis bolatyn. Jeke seriktes tek 13,5 myń jaryq núktesin jańartty, ıaǵnı ol óz mindettemelerin oryndamady. Nátıjesinde, bıznesmenderdiń jaýapsyzdyǵy saldarynan qala jetkilikti túrde jaryqtandyrylmady.
"Búdjet qarjysy bólindi. Jeke seriktes jabdyqty qalpyna keltirýi nemese alǵan aqshasyn qaıtarýy kerek. Modernızasıalaý jobasy 5 jyl buryn bastalǵan bolatyn, árıne, aýdıt júrgizý úshin sarapshylardyń keminde 3-4 aı jumys jasaýy qajet bolady", - dep túsindirdi “Almaty Qala Jaryq".