Bul týraly qalalyq TJD baspasóz qyzmeti málimdedi.
"Qazgıdromet" RMK daýyldy eskertýine baılanysty Almaty turǵyndary men qonaqtaryna búgin, 2024 jyldyń 8 qańtarynda ońtústik astanada tuman túsetini aıtyldy, dep habarlaıdy Almaty-akshamy.kz
"Qalada 8 qańtarda tańerteń, kúndiz jáne túski ýaqytta tuman túsedi dep boljandy", - delingen Almaty qalalyq Tótenshe jaǵdaılar departamentiniń habarlamasynda.
Osyǵan baılanysty ońtústik astananyń tótenshe jaǵdaılar departamenti tumandy jaǵdaıda kólik júrgizýshilerine asa saq bolý kerektigin eske saldy.
"Múmkin bolsa, sapardy keıinge qaldyryp, aýa-raıynyń jaqsarýyn kútken durys. Biz qaýipsiz júrgizýdiń basty kepili jyldamdyqty aıtarlyqtaı tómendetý ekenin este ustaýymyz kerek", - dedi departamenttegiler.
Sondaı-aq Almaty Tótenshe jaǵdaılar departamentinde týrıser men demalýshylarǵa taýly aımaqta barlyq qaýipsizdik sharalary men tártipti saqtaý usynyldy.