2021 jylǵy 1 qańtardan bastap jalpyǵa birdeı deklarasıalaýǵa kóshý bastaldy.
Qazaqstandyqtardy jalpyǵa birdeı deklarasıalaýǵa 2025 jylǵa deıin kezeń-kezeńimen kóshý qajet. Bul týraly Óńirlik komýnıkasıalar qyzmetiniń onlaın-baspasóz konferensıasy barysynda Almaty qalasy Memlekettik kirister departamenti basshysynyń orynbasary Orynkúl Qazıeva aıtty, dep habarlaıdy Almaty-akshamy.kz
Jalpyǵa birdeı deklarasıalaýǵa kóshý bastaldy – 2021 jylǵy 1 qańtardan bastap deklarasıalardy memlekettik qyzmetshiler jáne olarǵa teńestirilgen adamdar, sondaı-aq olardyń jubaılary usynady. 2023 jylǵy 1 qańtardan bastap memlekettik mekemeler men kvazımemlekettik sektor qyzmetkerleri men olardyń jubaılary deklarasıalanatyn bolady. 2024 jylǵy 1 qańtardan bastap zańdy tulǵalardyń basshylary men quryltaıshylary, sondaı-aq jeke kásipkerler men olardyń jubaılary úshin deklarasıalaý engiziledi. 2025 jylǵy 1 qańtardan bastap – azamattardyń qalǵan sanattary úshin.
Deklarasıalaý rásimi barynsha jeńildetilgen. Jyljymaıtyn múlik, áýe jáne teńiz kemeleri, sýda júzetin kemeler týraly, Qazaqstan Respýblıkasynyń aýmaǵynda tirkelgen kólik quraldary, arnaıy tehnıka jáne tirkemeler týraly, Qazaqstan Respýblıkasyndaǵy bank shottaryndaǵy aqsha týraly, sondaı-aq Qazaqstan Respýblıkasynyń ekinshi deńgeıdegi bankterine bereshek týraly málimetterdi kórsetý mindeti alyp tastalyndy.
Mundaı múlik týraly málimetter memlekettik kirister organdarynda bar, sondyqtan jeke tulǵalarǵa bul málimetterdi toltyrý aýyrtpalyq túsirmeıdi.
Deklarasıada QR sheginen tys múlik bolǵan jaǵdaıda – turǵyn úı qurylysyna úlestik qatysý týraly shart boıynsha turǵyn ǵımarattaǵy úles kórsetiledi. QR sheginen tys qurylǵan zańdy tulǵanyń jarǵylyq kapıtalyna qatysý úlesin, baǵaly qaǵazdar, týyndy qarjy quraldary, ınvestısıalyq altyn, avtorlyq quqyq, zıatkerlik menshik obektileri – osynyń bárin Qazaqstanda da, odan tys jerlerde de kórsetý qajet. 10 myń AEK mólsherindegi shekten aspaıtyn qolma-qol aqsha, debıtorlyq jáne kredıtorlyq bereshek kórsetiledi, ony notarıat kýálandyrýǵa tıis.
Deklarasıalar búgin qaǵaz tasyǵyshta 15 shildeden keshiktirmeı, al elektrondyq túrde 15 qyrkúıekten keshiktirmeı tapsyrylady. Qaǵaz tasyǵyshta deklarasıalar Memlekettik kirister organdaryna nemese HQKO-ǵa kelý tártibimen usynylady. Deklarasıany elektrondy túrde salyq tóleýshiniń kabıneti arqyly usynýǵa bolady (cabinet.salyk.kz), «elektrondyq úkimet» portaly (egov.kz), sondaı-aq e-Salyq Azamat mobıldi qosymshasy arqyly.
Budan basqa, deklarasıany usyna otyryp, jeke tulǵanyń elektrondyq sıfrlyq qoltańbasy bolýy mindetti emes, óıtkeni bir rettik SMS-qupıasóz arqyly eseptilikke qol qoıý múmkindigi iske asyrylǵan.
Búginde deklarasıalardy berýdiń eń tanymal tásili e-Sally Azamat mobıldik qosymshasy bolyp tabylady, onyń kómegimen QR boıynsha málimetterdiń 52% usynylǵan. «Salyq tóleýshiniń kabıneti» arqyly – 42%, «elektrondyq úkimet» portaly arqyly – 6% usynyldy.
Jalpyǵa birdeı deklarasıalaý erejelerin túsindirý úshin «1414» biryńǵaı respýblıkalyq nómir platformasynda salyq jáne keden máseleleri boıynsha baılanys ortalyǵy iske qosyldy. Sonymen qatar, tolyq aqparatty kgd.gov.kz resmı saıtyndaǵy «jalpyǵa birdeı deklarasıalaý» bóliminen alýǵa bolady.