Bul týraly QR Eńbek jáne halyqty áleýmettik qorǵaý vıse-mınıstri Nazgúl Saǵyndyqova Áleýmettik kodeks normalaryn túsindirý boıynsha jumys sapary aıasynda Almaty qalasynyń Óńirlik komýnıkasıalar qyzmetiniń alańynda aıtty, - dep habarlaıdy almaty-akshamy.kz
Halyqty jumyspen qamtý salasyndaǵy jańa Áleýmettik kodekste ıkemdi jumyspen qamtýdyń barlyq túrleri zań júzinde bekitilip, retteletin bolady.
«Usynylǵan jańa tásilder kelesi baǵyttar boıynsha júzege asyrylatyn bolady. Birinshisi – eńbek naryǵyn yryqtandyrý. Bul ıkemdi jumyspen qamtýdyń barlyq túrlerin, sonyń ishinde platformalyq jumyspen qamtýdy moıyndaýdy bildiredi», - dedi N.Saǵyndyqova.
Bul norma, spıkerdiń aıtýynsha, ózin-ózi jumyspen qamtyǵan azamattardy yqtımal áleýmettik táýekelderden qorǵaýdy, al olar týyndaǵan jaǵdaıda áleýmettik qoldaýdy qamtamasyz etedi. Osy maqsatta «táýelsiz jumysshy» uǵymy engizildi. Bul eńbek qyzmeti tabys ákeletin, biraq sonymen birge ýákiletti organdarda resmı memlekettik tirkeýi joq tulǵa.
«Mundaı jumysshylardyń qyzmeti, eger olar onlaın platformalardyń usynysyna qosylsa nemese jarıa kelisimshart jasasa, zańdy jumyspen qamtylǵan dep tanylady», - dep qosty spıker.
Máselen, taksı júrgizýshileri men kýrerler áleýmettik salyq rejımimen qamtylatyn bolady. Osy sanattaǵy qyzmetkerler úshin áleýmettik aýdarymdardy onlaın platformalar operatorlary júzege asyratyn bolady.
Sonymen qatar, sıfrlyq jumyspen qamtý ortalyqtaryn engizý máselesi qarastyrylýda. Spıkerdiń aıtýynsha, qazirgi júıe óńirlik eńbek naryqtaryn damytý boıynsha barlyq bastamalar men baǵdarlamalardy úılestiretin mobıldi ortalyqtarǵa aınalady.